一菜兩味!
2014/10/31 19:43:12 網誌分類: 生活
上星期作感冒---又唔係好嚴重(可能因為我每年都打預防流感針),有啲鼻水、有少少咳!正因為唔係好嚴重,所以冇睇醫生,食啲感冒藥(響藥房買,放屋企看門口嘅)、食念慈菴....
結果,鼻水止左,但係仍然有咳!突然諗起網友阿Cat很久前介紹過一個「開聲茶」,反正裡面啲都係好普通嘅中藥,於是去藥材鋪執左幾劑---哈哈!唔知係咪行運醫生醫病尾呢?上午飲左一劑,下午經已唔咳;果劑係「開聲茶」,唔係「止咳茶」喎!
話之佢係黑貓定白貓,止倒咳就係好方啦!我諗大家都知,咳親手尾好長架。
今日比較得閒,所以買左一斤西洋菜:煲個「開聲齋湯」同「金銀蛋上湯西洋菜」。
呢個湯響我食譜類曾經介紹過,今次加埋馬蹄同栗子,攤至室溫好好味(可以飲幾日):
此湯其中一樣材料係「羅漢果」,雖然祇落左四份一個,但係佢係此湯重要材料之一。兩年前加國曲友送左一打羅漢果俾我,到最近終於用晒。今早去「余仁生」買兩個羅漢果,$12一個,較市面買貴好多!不過,佢嘅藥材真係靚好多:我用過唔靚嘅羅漢果,味道相差甚遠。
售貨員問我有冇匯豐咭?原來匯豐咭有九折。
我答:「有!不過買廿幾蚊嘢,唔好意思碌咭!」
售貨員:「唔緊要!」
嘩,呢世人第一次用咭碌廿一蚊咋!
「金銀蛋上湯西洋菜」亦曾在食譜類網誌介紹過。
註:西洋菜、羅漢果、馬蹄均屬寒涼之物,寒底者小心食用!我係熱底,所以冇有怕。
我鐘意飲西洋菜湯,不過我係超級寒底。
我鍾意飲!
+1