水鬼升城隍

尋日講緊果班嘢做緊水鬼，異想天開，當自己係城隍；我就唔同呢，我真係水鬼，係人地想升我做城隍！

何謂「水鬼升城隍」？水鬼是池塘小鬼，城隍是護城神，由水鬼而被擢升為城隍神，自然是天壤之别。

我大大話話學「阮」學左兩年，頭果年半都係浪費青春(哼！你有青春可浪費咩)。何解？我曾經講過，因為老師冇開初班，所以我插班，一開始便是高班，所以讀左差唔多等如冇讀----證明我啲時間都係攞嚟嘥嘅！

今年年初，老師響堂上宣佈會開初班，我即刻舉手申請降班---唉！咁冇面嘅嘢，係我先至制嘅啫！唔係咩？白白俾左成年幾學費，依家又要重頭嚟過。

初班到依家都上左半年課。我自問係好學生，每日都有練習架！不過，問心果句：我放響溫曲嘅時間多好多囉！

老師在堂上，久唔久都指出我有咩嘢問題架-----梗係有問題啦，冇問題就唔駛嚟學啦。

尋日上課，老師又走埋嚟紏正我啲手指擺位。(鬼叫我未學基本功，先學人讀高班咩)

我地每一堂老師都會派新曲，然後一齊視奏(睇倒咩嘢譜，便奏咩嘢)；尋日視奏一首新嘅小曲「漁歌晚唱」，奏完老師響咪度對全班同學講：「阿Van，你好得喎！」梗係，真係第一次奏架！

我：「你剛剛先話我指法有問題！」

老師：「你其實進步好快，我剛剛一講、你即刻改倒！」

下課後，老師走嚟問我：「阿Van，你星期四下午得唔得閒架？」

我：「今日唔得！」

老師：「唔係今日。我好想你嚟參加逢星期四下午個師父仔局(即係個個都係明日嘅師父，今日仲未係)，你腰骨痛好番未？」老師叫過我兩次架啦，我都係用腰骨痛呢個理由推佢。

我：「腰痛好左好多，但係點都坐唔倒四個鐘囉！(一個局係四個鐘)阿？老師(老師的好友)都叫我參與佢個「塘水局」(即係海軍鬥水兵：大家水鬥水)，講到明唔會俾壓力我，我都請佢食檸檬！我應承你，我點同佢交待？」嘩！咁似唐佰虎點秋香橋段嘅！

老師：「我都唔俾壓力你架，我覺得你有天份成為一位好嘅音樂師父。但係，你要參與呢啲局，進步才快！你唔坐得耐唔緊要，你唱多啲歌啦！我好鐘意聽你唱歌架。你每局鐘意玩一首又好、兩首又好。」註：呢啲局玩音樂者輪流唱歌；此外，老師曾經在一個我攪嘅騷度擔任頭架(音樂領班)一職，果次七首歌、有三首係我唱嘅，所以佢聽過我唱歌。

唉！老師都講到任我橫行咁滯咯，我仲點好意思推呢？不過，我驚自己一鳴驚人，第日淪落為歌女咋！