金銀蒜蒸九肚魚

響街市見倒有九肚魚，二十蚊斤，唔係太大條，最好梗係用椒鹽煮啦！不過，自己整，少啲油都唔得，所以咪蒸嚟食囉！

材料：

九肚魚一斤去頭及腸略沖洗，一開二

粉絲一小束浸軟略剪短

蒜茸，多少隨意

炸蒜茸，多少隨意

蔥粒，可有可冇

調味：魚露

一. 粉絲放碟底。

二. 九肚魚用魚露、生粉、蒜茸及油拌勻，醃幾分鐘，拌入炸蒜茸。

三. 將魚放粉絲面，大火蒸八分鐘，如有蔥粒，洒上一焗便可。

註.

一. 魚露顏色深淺及咸度差距頗大，所以份量要自己決定。如冇信心，可下少一些，寧願整好後加蒸魚豉油。

二. 正式潮州煮法，會落冬菜醃魚(食潮州魚旦粉一定有)。不過，我自己唔鐘意食冬菜，所以唔落啫！