花十小時食個午餐！

我一向討厭出席婚宴---依家啲人攪婚宴，但求自己高興，唔理賓客感受！我試過一次響「洲際酒店」攪嘅婚宴，晚上九時入席，四個主婚人、一對新人、伴郎/伴娘全部要致詞，每一味菜之間又要睇片！在致詞與睇片期間唔上菜。結果，食到十一點先至上第二味餸，我冇佢咁好氣，一於走人----如此類推，十二點都食唔完！

不過，依家好多人攪婚宴都係攪到好晏都冇得食、或者好夜(或者係好早：零晨)都食唔完！我試過某朋友響金鐘某酒店擺婚宴，食到零晨十二點至完。

兩星期前有舊同事結婚，又係響酒店攪。佢打電話千叮萬囑話準七時半入席。當時我都質疑，佢解釋係因為搵專人擇左個吉時，佢咁講，我咪信以為真囉！哼，結果八點至坐埋檯，跟住要賓客睇中西樂演奏半小時，跟住當然亦唔少得呢個講嘢、果個講嘢啦，最攪笑係連新娘個妹都要講嘢----仲全部中英語對照：即係多一倍時間啦！結果....未食完要走啦，因為要趕尾班車！

今日同學嫁女，年頭經已叫定班同學預留日子(想話唔得閒都唔得)。大家一直以為係晚宴，兩個月前才知道是午宴；席設淺水灣酒店。兩年前舊同事嫁女亦在此酒店設晚宴，但那次儀式很簡單，正正常常食個西餐走人。正因為果處偏僻，主人家一定會安排旅遊巴接送賓客來往金鐘。

今次請貼寫左十一點半儀式，十二時入席。我們幾位同學約左上午十時響金鐘等埋一齊搭旅遊巴。我份人一向早到，加上隧巴因為「佔港」唔知邊度有站，穩陣計搭小巴出佐敦轉地鐵----醒唔起今日星期六，很快經已上左小巴，去到佐敦才九時！佐敦去金鐘頂多預廿分鐘，結果咪食個早餐囉！(原本我諗住唔食早餐架，因為午餐太heavy啦！)

乘旅遊巴去到酒店，才知道儀式在戶外舉行。早幾日都仲係烏天黑地，今日陽光普照！不過我地呢班人怕太陽，見光死架！成班人走去有太陽傘嘅地方避光。唔知是否律師遲到，儀式延至正午十二時多才舉行。嘩，烈日當空，賓客坐位向正太陽(有太陽鏡都唔掂，我亦忘了帶太陽鏡)，又冇帳篷(做咩嘢唔去金鐘拎啲用呀)，一個二個打開傘遮太陽，好在今日拎左份頭條日報，用佢嚟遮太陽啦！不過，遮倒頭、遮唔倒腳，即使著住褲、大腿一樣晒到好似俾火燒咁！

等到一點鐘，終於可以入室內等食晏咯！但係每樣食物都等好耐(第一味麵包都要點半先拎嚟)，食到三點幾---都唔知呢個算係午餐定下午茶餐？有幾位同學好似我咁，諗住十二點有嘢食所以冇食早餐，餓到發瘟！好在我錯有錯著，食左個早餐；反正啲食物又唔係咁好食，所以甜品(甜品原本係我至愛嚟)、咖啡茶、我都冇享用！

頭盆：上面芒果粒，下面係半生熟帶子。我覺得唔好食：一係食剌身帶子、一係食煎熟帶子---半生熟，食落啲味怪怪地！

忌廉南瓜湯：一般啦！我整好食啲。

主菜兩款：魚配大蝦/鵝肝配牛柳。我食牛柳，雖然祇係得七成熟，但係食落好乾、而且冇咩嘢牛味。掛住食，唔記得影相---我係牛魔王嚟！

 甜品：朱古力慕絲。食左一啖唔食啦，太甜！

結婚蛋糕：食晒！因為相對嚟講，唔係咁甜。

食到三點幾(唔食都唔走得，冇車)、上旅遊巴去到金鐘接近五點(因為佔中，香港仔隧道極塞車，今次連我地班同學裡面惟一一個支持「佔中」嘅都話：好心佢地乖，返屋企啦)，返到屋企差不多六點！為左食個午餐花成十小時，係咪慘過食晚宴呢？俾強光照過之後，個人好疲倦。

最慘係攪亂個晒生理時鐘吖馬！我通常五點半食晚餐，今日三點幾先食完午餐，五點幾點食晚餐呢？但係又唔可以唔食嘢捱到第二朝！另一位同學跟住要買餸煮飯俾屋企人食，但係佢返到新界都六點幾啦，你話幾趕吖？另一位同學老公等佢返屋企食晚飯(佢地習慣六點半食)，但係佢又點食得落呢？

唉！以後呢啲午宴，唔駛預我----我寧願罰款了事！