佔中_本身喺犯法1

從另一個角度睇, 佔中喺羊群心態下嘅催生物! 大部份大中小學生未必知道佔中真正背後目的喺乜嘢! 喺過去兩個月期間, 筆者從唔同環境聽到學生提到佔中, 個個都表現得好興奮, 有啲仲以為參加嘉年華會玩一陣間啫, 點知一玩就玩咗兩個月. 呢段時間之內, 班學生有冇依時上堂? 有冇做好功課溫好啲書? 有冇足夠精神應付考試?

佔中入面, 除咗所謂大學生聲稱自己有獨立思考能力之外, 一班中小學生又有冇大學生同等思考能力? 大學生可以預咗唔畢業, 甚至因為佔中犯法而被拉之後留有案底永不翻身, 一班中小學生有冇大學生呢種魄力? 大學生聽信佔中三位龜縮發起人嘅謬論起而犯法, 最低限度時至今日唔見佢地有任何承擔, 只推講會自首仍未有時間表?

呢種自說自話推全港學生入火坑嘅教育敗類, 將一面倒嘅負面訊息移植到下一代心靈深處, 令佢哋是非不分黑白顛倒, 將批判思維發揮到淋漓盡致, 令香港未來三十年以至到一百年, 市民完全生活在批判世界. 對於事實真相充耳不聞, 只知道凡違逆我心意嘅人就喺敵人, 就要接受批判. 同當年文革一班紅衛兵嘅作風又有乜唔同之處?

孔子話: 博學, 審問, 慎思, 明辨, 篤行! 睇今次佔中行動入面嘅人, 包括佔中三子發起人在內, 冇一個有呢五樣工夫就出嚟話要爭取呢樣爭取嗰樣! 如果, 有一個人能夠有呢五樣工夫, 佔中效果就唔會喺一盤散沙. 佔中嘅作風有己冇人, 以私人理由為佔中而佔中, 未有思前想後; 未有應變善後; 未有推己及人; 咁樣佔中成功冇天理!