混醬羊腩煲

早兩日天文台經已預告：呢個星期一日比一日冷！

反正今日冇咩嘢時間，所以尋晚整定煲羊腩煲，咁今日翻熱就食得！而且，炆嘅餸，隔夜仲好食。

今次改左用「混醬」煮：因為屋企冇南乳，但係有好多其他醬料。同時，亦冇用馬蹄，改左用筍。當然可以兩樣都用，但係太多料食唔去；馬蹄同筍，我比較鍾意食筍。

材料：

急凍羊腩粒一包溶雪飛水

清水筍一罐去水洗淨切片

冬菇幾隻浸軟蒸熟

冰糖

香葉兩片(可以唔落)

蒜茸/薑片

柱侯醬、磨豉醬、腐乳醬(份量多少視個人喜好，喜歡邊種醬咪落多啲囉！否則同等份量亦可)

一. 白鑊將羊腩烘乾取出。

二. 燒油爆薑片，蒜茸，下羊腩、冬菇、香葉及醬料炒勻，灒酒再兜炒。

三. 下適量水及冰糖煮滾，收細火炆約個半小時至羊肉夠稔即可。