政縛法

施威喊立政縛法

阿民當堂口擘擘

建仔徬徨心更焦

難怪紫城爛笪笪

呢嗱、俗語都有講、偷雞不成蝕把米吖嘛！今次阿民煲燶藥嘥心機、賣黃雨遮賣出個大頭佛來、結果搞到蝕老本收場、仲被施威食住上、話要依據「各製法」搞個甚麼「政縛法」出來、縛住呢班友仔、並規定所有阿民幫會必須公開所有幫眾嘅個人資料和所有捐款來源、十足十擺部 X光機日日照住班友仔、連佢哋食咗乜嘢落肚都睇得一清二楚。雖然政棍一向不分左右、財來直受、誰出得起錢就幫誰、但俗語都有講寧願被人知、亦切勿被人見。試問又有誰願意拿高自己個肚皮任人睇？呢單嘢咁濕滯、莫講話阿民唔肯、就算係建仔亦未見得會贊成。

施威呢頭將黃遮檔攤摺埋、嗰頭就喊要將「政縛法」擺上台、似乎是要趁着阿民被黑金纏身之際而有所作為、而且還算準呢班友仔在此時必定投鼠忌器、不敢強烈反對、因為誰反對誰就是賊、呢一招都咪話唔夠絕。之但係、事實告訴我們、山姆大叔全憑黑金之力搞垮沙鵝聯幫大帝國、現在又以黑金搞到非洲立立亂、只要搞垮埋東方一條龍就可獨霸天下。因此即使成功立法、亦未見得能夠消除黑金誘惑。在政棍心目中當然是無法總比有法好。因為無法可以肆無忌憚為所欲為、而一旦制訂了法例就會受到諸多掣肘。不過出得來行、通常都有幾度板斧防身。所謂道高一尺、魔高一丈吖嘛！既然唔准賣狗肉、那就掛起個羊頭做生招牌、咁就冇晒問題架嘞。吓、你問我到底「政縛法」成效有幾大？哦、咁就真係要睇過至知喇！