打出個盈餘

衙門年年喊水緊

忽然宣布有餘銀

皆因有人搞亂檔

連忙放水潤諸君

自從鬍鬚仔上任金紫荊賬房大掌櫃以來、每年都在預算案之中先喊救命、但到頭來大賬房年年水浸、因此贏得守財奴稱號。之但係鬍鬚仔今年忽然樂觀起來、聲稱在未來三年都會有錢剩。有人話佢轉咗死性。但在下左想右想、還是覺得此事唔係咁簡單。記得去年施威曾經開口喊佢開水喉、但佢死攬住個水嚨頭唔放、仲反過來喊施威慳啲使。現在不獨只主動放水灌溉建屋基金、還暗示往後三年供水陸續有來。由此可知、鬍鬚仔咁爽手必定另有原因。依在下估計、若非發生那七十五日書生打傘事件嘅話、今日都唔使主意這信孤寒大掌櫃肯主動放水。所以話啫、人總係唔見棺財唔流淚嘅。

江湖上早有傳聞指出、鬍鬚仔與施威一直都唔啱嘴形。鬍鬚仔之所以能夠在啱僧老走之後繼續掌管大賬房、完全是有勢力人士向萬歲爺極力推薦嘅結果。他的責任就是要平衡各方集團利益、以及防止有人在民粹方面大灑金錢。所謂壓迫力越大、反抗力越強、去年嘅一場書生打傘、將抑壓在年青一代心中嘅怒火引發出來、結果要朝廷出手干預才能暫時擺平件事。事情到咗這個地步、城中及朝中的倒施勢力再不敢指責施威為了豎立個人權威而大搞民粹、更不能像以往一樣用盡方法妨礙他搞民生建設。難怪有人話、今次書生打傘不獨只將政客嘅假面具打破、連某些勢力人士嘅氣焰也被打得自動收斂起來、最駕勢就係居然打出個盈餘出來吖嘛！所以本人懇請各位街坊以後唔好再話書生打傘有破壞冇建設。相信今後幾年紫府必會推出一系列利民措施舒緩民間怨憤。也許那些措施可能只是杯水車身、但總算踏出第一步吖嘛！係咪？