尋找街市中的智慧

上星期去街市個花檔買馬蹄，見一位女士正在等待檔主婆婆幫佢斬牛大力。婆娑見我祇係買馬蹄，便先秤了給我。

趁有少少空檔，我問那位女士：「你買牛大力，有何用途？」

女士：「我響加拿大回流香港，返港後經常有骨痛情況，聽婆婆教煲牛大力、土茯苓，骨痛情況明顯有改善。」

我：「可能香港天氣比較潮濕啦。」

今日星期天，可能大多數人選擇出街食飯，所以行街市的人較平日少。於是去花檔搵婆婆傾計，咁梗係要幫趁埋啦，唔係鬼睬你咩！

婆婆教落：「你買五十蚊土茯苓、牛大力，加三十蚊豬脊骨或者豬尾骨(或買冰鮮烏雞/雞)、果皮(唔記得唔落都冇問題)，亦可加少少田七。」

我：「可唔可以加杜仲呀？」因為屋企有。

婆婆：「可以。你依家有冇痛吖？」

我：「有呀！」

婆婆：「咁我同你加少少？？？」聽唔明。「你有冇幫趁隔離三檔花檔呀？」

我：「冇呀。(呢個係事實，我唔會講大話)係呢，你依家冇買花咩？」

婆婆：「係呀！做唔切呀。你第日續檔買嚟試吓，有比較先知邊檔好吖馬。」咁又係，多左人買呢類生草藥，處理需時；我落左柯打、婆婆都叫我買完餸先返去拎，亦冇要我俾左錢先---咁一係我個樣話俾佢知我唔會走數、二係佢嘅嘢唔憂賣，你走左咪賣俾第二個囉！

我之後、又有一對印度夫婦同一位女士嚟買，要排隊呀！

婆婆：「我八十幾歲啦！你地唔可以等到骨痛先處理，平時久唔久都要煲嚟飲。」一次煲大煲啲，分幾日飲，最少要煲三個小時。

睇吓婆婆就好有說服力---八十幾歲，日斬幾廿斤牛大力、土茯苓，真係唔講得笑。一個「服」字！