煎釀三色椒

三色椒平到你唔信，一包三大隻都係九蚊，買六蚊(四兩)鯪魚肉加埋先十五蚊，咁就一碟餸咯。

材料：

三色椒各半隻(人少三隻真係食唔去架)

鯪魚肉四兩(我買經已調左味果啲)

蒜茸/豆豉(沖一沖略拍)各少許

一. 三色椒切角，洗淨徹底抹乾，椒內洒上生粉。

二. 將魚肉釀入椒內。

三. 蒜茸、豆豉放小碗內，下糖、生抽及麻油拌勻。

四. 燒紅鑊下油，將三色椒放入(魚肉向下)煎至半熟，在鑊一邊倒入(三)及少許水，兜勻蓋上焗至全熟，如水份太多可埋芡上碟。

註：

四兩魚肉對呢一隻半椒唔係好夠(西椒大小不同，邊有咁啱吖)，所以釀得好薄。不過，如果買半斤一定過多！解決方法：

一. 留番啲椒唔釀淨係煎熟佢食；

二. 在魚肉內加入其他材料：冬菇粒、蝦米粒、臘肉...使釀料多一點；

三. 買半斤魚肉，釀剩左咪煎香啲魚肉食囉！