「維格餅家」賀年禮盒

急景殘年，還有一個月便是農曆新年。

去拜年，買咩嘢禮物俾人？我通常抱住「己所不欲、勿施於人」心態：我唔食糖果，所以近呢十幾年我多數係選送餅食、間中也會買雜錦果仁禮盒(我舅父喜歡杯中物，佢鐘意)。同樣道理，我最怕收到糖果；我的一位「豬朋」，每年嚟拜年都係一盒大「金莎」(中左廣告毒不成？)，我去年忍唔住都要講句：「你俾少少新意好唔好？」

豬朋：「愿諒吓啦！」收禮都咁揀擇，我都覺得自己乞人憎！我地識左接近卅年：熟不拘禮架。收倒糖果我唔食、仲要想法子安置佢，好鬼麻煩！

我也曾收過一份鮑魚麵禮盒：入面有一隻即食鮑魚同一包鮑魚麵。結果我食左隻鮑魚，將啲麵送左俾人食。我唔係唔食麵，係除左正餐，我好少無端端會煮個麵食啫！

結論係：送禮俾人，最緊要係啱人地心水。不過，要做到呢樣嘢，你要好了解收禮果一方至得！

前日收到遠方送來一份早到了的賀年禮盒：台灣「維格餅家」2015賀年禮盒。

裡面有：鳳梨酥一盒五件、牛軋糖一盒七粒、南棗合桃糕一盒六粒、趣豆三盒(三款味道：雞汁、梅子、芥末)。一個禮盒，包括餅、糖果、花生----真係一網成擒呀！

朋友去完台灣旅行，例牌會帶台灣特產鳳梨酥(或者太陽餅)返港請朋友/同事食。香港人一般都喜歡食鳳梨酥，我那位台灣通嘅「豬朋」指出：傳統鳳梨酥是以土鳳梨做餡，食落較煙靱；「維格」的鳳梨酥，加了冬茸，食落少了煙靱、多了清甜---正是咸魚青菜，各有所愛！香港人至愛「恆香老婆餅」(實際是冬茸酥)不也是用了冬茸做餡料嗎？

南棗合桃糕亦是我喜愛食品之一。不過，南棗與桂圓，我比較喜歡桂圓味多啲。

牛軋糖：我講左我唔鍾意食糖。不過，記憶中，香港「皇后餅店」做的牛軋糖(佢好似叫「鳥結糖」)做得最出色！但如果我依家再食(年紀大左講求健康多啲啦)，我會覺得佢過甜。此牛軋糖成份雖然有糖，但係食落一點不甜，也沒有食開的牛軋糖黏牙！

趣豆：(其實是脆皮包著花生)花生，對我來說是又愛又恨！我鍾意食，但本身是熱底，食少少都會喉嚨痛！你知啦，唱歌之人，喉嚨痛慘過大病架。

我冇諗過可以整梅子味，又幾新鮮喎---三款味中，我最喜歡梅子味、雞汁次之(冇法子啦！雞汁味太普通啦)；至於芥末味，我冇試：識我嘅人都知我怕辣，食刺身都唔點Washabi架！

食趣豆令我諗起一種兒時食物：魚皮花生---花生外包著一層鬆脆、兼有魚味嘅外殼。此小食看來經已失傳！

食花生最緊要係花生靚啫！食食吓，祇要咬倒一粒壞份子，咁就咩嘢mood都冇晒啦！不過又不得不讚吓，佢啲花生真係好靚喎--我有備而戰架，焗定杯花旗參茶用嚟清熱架。

整體上，佢啲食物甜度都較低，可能係要迎合現代人少甜、少咸嘅飲食原則掛。不過，鳳梨酥保鮮期較短，要留意！

下面係餅家官方網頁所拍嘅照片，專業攝影，梗係靚過我果啲啦！

佢地出左幾款賀年禮盒，呢個係其中一款。有興趣的話，可以去佢地個網頁度睇吓：

 http://www.taiwan-vigor.com.tw/06order/index.php