高低立見

尋日朝早覆診，中午過灣仔攞啲嘢，攪掂左接近一點，行經「集成中心」，於是就在裡面的Pacific Coffee坐低飲啖茶、食個飽！

近呢一年，我經常幫趁銅鑼灣「信和廣場」間Coffee Bean and Tea Leaf(去年五月網誌介紹過)：通常係飲一杯細莫加咖啡加一件提子烘餅。不便宜，差唔多六十蚊！不過任你坐幾耐，而且我每次走的時候，職員都一定會跟我說聲「再見」----咁樣做唔係必要，食肆最緊要係食物質素啫。

尋日我由灣仔行落銅鑼灣方向，所以途經「集成中心」；反正都係食同類嘢，咪入去Pacific Coffee食囉！紅磡亦有一間分店，我通常是陪姪女去飲咖啡，未試過佢嘅食物。尋日叫左薄荷鮮奶咖啡同玉桂味都甩。

在Coffiee Bean and Tea Leaf 叫嘢食，職員一定會問你需唔需要加熱？Pacific Coffee 職員冇問---可能你要自己提出，佢先幫你加熱；又或者根本冇呢種服務提供！

佢冇問、我亦冇要求---可能啲食物全部剛剛出爐呢！

事實當然唔係啦：件都甩硬過我條命，切開都好艱巨(我有理由相信唔係即日整嘅)！至於杯咖啡：薄荷味與咖啡味都偏淡(唔合格)！

你走果陣，根本冇人理你！我唔清楚係呢間鋪嘅問題、抑或係Pacific Coffee整體嘅問題。

劉德華話齋：今時今日，咁嘅服務態度係唔得架！

反正價錢差不多，以後我寧願行多兩步，幫趁Coffee Bean and Tea Leaf. 果度啲職員會問你：提子烘餅你想跟牛油定果醬？咖啡需唔需要加忌廉？