環保 v 現實

自從超市實施徵收膠袋費用後，我便響手袋放一個環保袋，以備不時之需！

不過，放得響手袋嘅環保袋大極都有限、承扥力亦有限！所以，依家響超市每次都係幾十蚊至一百幾十蚊消貴；除非諗住要買重物，才會帶架手拉車入超市「濕平」。好處咪係慳番好多囉---以前見有特價嘢，會買多左！依家非必要都唔買。自己帶嘅環保食盛載冷藏食物始終唔方便！

不過，除左超市，其他地方買嘢一樣有袋提供---所以屋企收收埋埋都好多袋！即使環保袋都多到要棄置。

我美國果個姪仔係環保支持者：以前收銀機出完紙，佢用反轉後面再用；過年送禮、堅持禮物唔要花紙包裝、唔食髮菜....

政府宣傳片講遲些時，無論任何物料、任何設計款式的袋一樣要收費。

其實如果祇係收五毫子，我都寧願俾啦！難道用自攜嘅環保袋，裝完超市食品裝衣裳、化妝品？點都講唔通啦！呢啲情況祇會響深圳購物才會出現---有響深圳購物嘅都知：佢地提供嘅超薄膠袋，仲衰過用自己個環保袋！拎左返屋企都冇用。

我曾經諗過買個買餸籃行街市架！不過，一來個買餸籃好大(其實係我買得餸少)、二來價錢不便宜、三來一定要日日清洗(到時又变左浪費食水)，唉！算罷啦。

中學同學E(梗係與我一樣，都退左休啦)的姪兒開了一間西餐廳(都算小型，走中價路線)，因為請唔倒人做清潔，同學見一場親戚、自己反正又得閒，咪去幫手做義工囉！我地中學同學聚會時，大家聽倒佢咁講，我第一個反應係：「你年紀唔細架啦！幫人有極限，要請人點會請唔倒？出嘅工資亦唔差。」人工高過剛畢業嘅大學生。

同學E：「佢真係有請人架！不過個個嫌辛苦，做幾日就唔做。」

我：「我樓下開左間迷你冰室(得廿四個坐位)，佢地全部用紙杯紙碟，慳番請清潔工人。」

同學們：「咁咪好唔環保？」

同學E：「我姪仔一定唔肯，會覺得成個格調低晒！」

我：「有冇諗過外判俾人做？」

同學E：「試過啦！一樣洗得唔乾淨。」

我：「咁咪係囉！顧客心態：你寧願用啲唔乾淨嘅杯碟、定係乾淨嘅紙杯碟？」

環保與現實，如何取得平衡？