羊年有咩好？

羊年一開始，個鐘搭正零晨十二時，喉嚨便開始唔舒服，立即起身食一匙念慈菴。

第二天上午出門口拜年，著得衫少，風大！唉，可能係我本身作病掛！傍晚拜完年，趁中間有啲時間，速速返屋企著多件衫，才去赴瑛師伯約：食齋。

年初二開始，沾寒沾凍、流鼻水、咳、微燒....要咩嘢、有咩嘢...除左錢！

還有一星期便出「騷」，理論上應該要即刻睇醫生；但係好病唔病，年初一病，邊度有醫生睇吖？咁咪食Neosep頂住先、間中又沖「三冬茶」飲、舅母話「蒸洋蔥水」得喎！真係藥石亂投，不理好醜，但求就手！

捱到年初四，竟然見有中醫應診喎，第一時間走入去睇啦！尋日、今日食左兩日藥，希望過兩日冇事啦---喉嚨痛、咳都好麻煩，手尾長！

去年年尾，幾位朋友的母親離世；早兩日搭小巴，我坐響左手面第三個單人坐位，忽然間小巴一個大轉彎，我右邊手俾人大力一撞，跟住見倒位阿伯由後坐成個人拋起，坐左響通道上。(咁樣較直接由坐位跌落地更傷)

好神奇，阿伯粒聲唔出，自己坐番響個位度。

隔離位男士：「阿伯，你有冇事呀？」阿伯唔睬人。

跟住有兩位坐得較前的女士問：「你冇事吖馬？」阿伯一樣唔睬人。不過，睇嚟果兩位女士係同佢一齊嘅。

隔離位男士：「佢本身有冇病架？駛唔駛睇醫生呀？你落左車就冇人負責架啦！」

兩位女士：「佢有心臟病。」不過，佢地最終都冇諗過要睇醫生檢查。

年初三一位舊街坊來電跟我拜年，佢年紀較我大，不過一向熱衷參與團體活動，還經常做攪手。他告知：年尾一次旅行，他站在旅遊巴司機後向團友講解時，旅遊巴突然轉彎，他便由前頭跌到去車尾，傷左三條肋骨(好彩冇斷)，依家仲隱隱作痛。

類似的意外，我年輕時都曾經發生過，當時見起番身冇咩嘢便當作冇事發生，其實好可能經已跌傷左腰骨(彎左、扁左)，祇不過年輕時冇事，唔理佢，依家老來就出事！

尋日將軍澳七車連環相撞！

所以，行船跑馬真係三分險；人家說：乘車千萬不要打嗑睡！雖然意外之事，你清醒都未必管用，但係唔清醒就更加咩嘢都做唔倒！

今早舊老板打電話同我拜年，還問我三十多年前的一些人與事，佢要寫回憶錄喎！好彩，我雖然病，但係頭腦清醒，冇俾佢考起！