永遠的關注

眾生原來係棄嬰

老爺扮作觀音兵

今日滿城皆炒客

它朝怒火更難平

正當社會上人人都話樓價狂飆是反映出樓宇供應不足、只有增加供應量方能符合社會須求。之但係、紫府嘅裁褲事務部部長親家強就公然唱反調。佢話近年房屋供應量已較以往大大提高、而且現時嘅「潛在供應量」及「實質供應量」都非常可觀。吓「潛在供應量」都得？睇嚟、如果講者唔係患上思覺失調嘅話、就梗係玩語言「偽述」矣！

所謂冤豬頭都有盟鼻菩薩、原來有好多稱贊親家強部長以「潛在」呢兩個字來頂住條圍、確係聰明絕頂之舉。原因「潛在」就即係未曾呈現出來、會否呈現、何時呈現、都係好難講得準確。由於「潛在」這辭匯具有未能確定和不能否定嘅本質、每當人們須要自圓其說嘅時候、這兩個字就大派用場、但你又係偏偏吹佢唔漲。明未？由此可見、官老爺嘅語言「偽術」個個都有番咁上下、而且官做得越大、「偽術」造詣也越深厚。難怪親家強嘅大佬、公家大賬房掌櫃抓錢華每年嘅支收平衡估算都咁具「偽術」性啦！

官老爺一面時常將「密切關注樓市情況」八個大字當經咁念、但另一方面又不見有奏效嘅法寶使出來。雖然縣太爺使出雙辣招出來應酬街坊、但係樓價不跌反升、而止仲係步步高升。難怪有人話呢啲就係口惠而實不至、亦有人認為紫府其實早已挑通眼眉、知到有啲嘢係想撳都撳唔嚟、倒不如趁勢打份數為公家大賬房撈一把好過。咁就難怪呢一聲「關注」一講就講足三十年、而且依然停留在關注嘅階段之中了！

講開又講、人民公社裡面嘅代表諸亦公未見得對樓價加風作認真看待、否則又點會任由官老爺自圓其說？其實當樓宇炒賣活動發展到某個程度嘅時候、人們就知到非個人意志可以改變。你改變唔到、我改變唔到、公社代表也改變唔到、甚至連紫府都同樣改變唔到。究竟真係改唔到、抑或根本唔想去改就不得而知、但係人都知到、發錢商賺到盤滿砵滿、內外炒家也賺到腦滿腸肥、公家大賬房有如豬籠入水、行企會和人民公社裡面亦有大把人撈到家肥屋潤、唯獨是只有一班申請公屋唔合格、居屋抽唔到、私屋買唔起嘅「黑仔」日日喺度發樓寒而矣！喺咁嘅情況之下、樓價之所以瘋狂飆升就不難理解啦！唔知到呢檔「粗龍」仲可以刮得幾耐呢、吓？！！