向難度挑戰！

佔領運動後香港三間龍頭大學在全球大學聲譽排名榜的排名急跌！英國《泰晤士高等教育》最新公布的全球大學聲譽排名，香港大學由去年的四十三位急降至今年的五十一至六十位，創下歷史新低，科技大學亦由五十一至六十位降至七十一至八十位，中文大學更跌出一百位。有香港學者分析，佔領行動或令外界擔憂香港的大學或無法聚焦教研影響質素。

去年港大、科大及中大均打入聲譽榜一百強，今年三間排名都插水，當中中大由排名八十一至九十跌至一百名以外，反觀亞洲其他大學能保持一貫水準，日本東京大學排名十二，新加坡國立大學排名廿四，與去年相若；中國清華大學更由去年排名卅六勁升至廿六位，北京大學亦由四十一躍升至卅二位。排名首三位分別是美國哈佛大學、英國劍橋大學及牛津大學。

城大專業進修學院學術統籌宋立功指，不少大學教授、大學生曾參與佔領行動及罷課，或令人覺得本港大學教學工作受影響而無法聚焦教研，令國際學者質疑本港大學質素下降，相信他們或在未來幾季留意本港大學發表國際性論文的數量及質素，了解本港大學是否回復正軌。

-------------------------------------------------------------

一個人、或者一間機構，最弊係自我感覺良好，故步自封；所謂學海無涯，不進則退！即使自我感覺良好，都要多聽不同意見，唔能夠偏聽(啱聽就當真)，咁樣一定唔會有進步！

呢幾間大學，前人經過幾許努力，才令學府有之前的成就；可惜吖，依家無論係教果啲、或者學果啲都志不在學好點做人，祇係學點樣去遊行示威，如何唔駛做可以上樓；唉！咁嘅質素，遲啲連一百強都入唔倒呀！(中大經已跌出一百強啦)

--------------------------------------------------------------

我雖然病左接近一個月，歌又唱唔倒，我閒時都會拎啲曲出嚟齋嗡、唔唱出聲(都出唔倒聲啦)。

幾年前學左唱「唐宮綺夢」、去年又學左「蘇三贈別」，呢輪見無所事事，搵首「重溫金粉夢」出嚟學唱，咁啱幾首都係梁素琴唱嘅曲；可能因為我師父專攻嚴淑芳腔，而梁素琴與嚴淑芳據知是妯娌，腔口好相似，所以我除了嚴淑芳嘅歌之外，好多時會搵梁素琴嘅曲嚟唱。

梁素琴嘅「孔雀東南飛」係我至愛歌曲之一。前年亦搵呢首歌出騷，花絮係之前好多相熟嘅曲友都唔肯學呢首曲，嫌佢難唱；但係聽完我唱之後，佢地叫老師教佢地唱(呢啲歌，如果冇人要求，老師唔會教)，我覺得我將呢首曲發揚光大囉(又做老鼠)！

我響舊網都講過，呢啲又舊又難唱嘅歌，老師唔會教，即使學識左都冇人陪你操！我算好彩，果首「唐宮綺夢」學識之後，亂打亂撞竟然我師父其中一位學生識唱，結果出埋「騷」添！至於「蘇三贈別」，我連平子喉都學埋，預左他日即使冇人陪我操，我一個人都可以唱！

呢幾日學緊「重溫金粉夢」，又真係幾難唱。我講嘅難係你跟足梁素琴唱腔所以難，如果係隨自己意思唱「二王」、「反線中板」又真係冇難度嘅。

------------------------------------------------------

依家嘅年輕人，無時無刻做低頭族。即使面對面，雙方都用whatsapp、短訊....傳遞訊息。咁樣做其禍無窮：

一. 對頸椎有壞影響；

二. 久而久之，人與人失去面對面溝通技巧；

三. 因為用whatsapp，短訊溝通，用嘅文字祇求對方明白，不求通順及文法，甚至夾雜中英語。久而久之，連寫一篇文字都變得狗屁不通。

最慘嘅係，年青人仍然沈醉響自己嘅良好感覺中---以為入左大學，便是天之嬌子！不知道上海等地經已不知不覺超前、不知道大機構已開始北上吸納內地精英....繼續發你們的春秋大夢吧！