大鄉里落鄉

由鄉郊走去城市，叫做大鄉里出城；相反，我呢個由市區走入新界嘅、咪叫做大鄉里入鄉囉！

由於工作關係，我對香港島、九龍同新界大部份地區都算熟悉，惟獨屯門與元朗兩區，我認識甚少！記憶中，我咁大個人，入屯門次數真係十隻手指數得晒。有三次仲係因為要去開會，有司機接送，所以你叫我自已搭車去，我真係連東南西北都分唔清。

兩個月前，住響屯門嘅曲友經已同我講，果區有一間專賣晚裝嘅鋪頭，好便宜，叫我得閒去睇。呢位曲友與另一位曲友芳芳係幾十年老友(我都係經芳芳認識佢)，如果入屯門，梗係約埋芳芳一齊啦！但係芳芳祇可以星期六或日才有時間，但係呢輪屯門、沙田與上水都係「反水貨區」高危區，我驚去到撞倒班「瘟神」；屯門？去唔過！

地膽曲友告知，果班「瘟神」活動地區與我地打算去嘅地方唔同，叫我唔駛擔心。終於約左尋日入屯門，消磨左成日。

原本約左十二點半響屯門會合，地膽才醒覺原來佢約左人唱K，要三點至得閒！曲友芳芳話，反正佢都知掟，由佢帶我去，三點鐘會合再算！芳芳驚太晏入去，我唔夠時間試衫。我問：「地膽唔得，邊個接我車？」(我真係唔識路架)

芳芳：「得！我響車站接你。」(佢都住響市區，不過經常入屯門)

地膽早一晚whatsapp我，叫我響紅磡車站搭260X，響「吉之島」站落車。由屋企去，我預左一小時十五分鐘。上車後望吓啲車站名稱，都唔見有個「吉之島」站！

架車響油麻地同佐敦轉來轉去，加上塞車，好驚過鐘呀(千年道行一朝喪)！當車行至奧海城，那時是十二點零五分，接到芳芳來電。

我：「吓！你唔係咁早到馬？」

芳芳：「係呀！我一早同老公入屯門飲茶，飲完茶咪叫佢自己返屋企囉。如果你到左奧海城，應該仲有廿分鐘車程啫！我行一陣返嚟接你。」

我：「好似唔見有個叫「吉之島站」喎，你睇吓個站名係咩嘢？」

芳芳：「哦！叫「屯門市中心」。」

去到目的地，芳芳經已企左響度。

我：「嘩！我從來未試過咁準時(剛好十二時三十分)。」識我嘅人都知，我通常都唔準時，我祇會早到。

芳芳帶我去睇晚裝。講真吖，果啲款真係唔係我杯茶囉！所以祇逗番廿分鐘，便開始兩傻遊屯門，行完新墟行舊墟，最終響間餐廳落腳等埋地膽同佢位唱K歌友(我地都有一面之緣)飲下午茶吹水---咁又吹左兩個鐘！

飲完下午茶，地膽位朋友先行離開去買餸，跟住就開始三傻活動，一個「嬲」字，因為佢兩位都係平喉：即係兩男一女啦！

呢座就係屯門目前嘅地標：

市中心嘅商場我冇興趣，因為各區大型商場店鋪類似，冇必要山長水遠走入嚟睇！不過最終響附近啲小鋪買倒啲心頭好。

行到七點，響「客家好棧」晚飯，繼續吹水吹到八點幾才打道回府。