梅菜炆雞翼
2015/03/30 10:39:07 網誌分類: 食譜
冰格剩左幾隻雞中翼,一於煮埋佢食,清吓個雪柜啦!點煮?一於用梅菜炆啦。會唔會覺得奇?梅菜炆豬肉都得,咁點解唔可以炆雞翼呢?
材料:
急凍雞中翼八隻(溶雪洗淨,徹底抹乾)
製過切碎甜梅菜約三至四湯匙
薑一片
蔥花(因為冇去街市買餸,攞唔倒蔥,所以唔落)
調味料:水160毫升、生抽1湯匙、糖1 1/2茶匙、鹽1/4茶匙、麻油
一. 雞翼下紹酒1湯匙、生抽1湯匙及糖1/2茶匙醃過。
二. 燒油,將雞翼排上略煎兩面,下薑片同爆,倒入梅菜炒勻,灒酒,下調味料煮滾,收細火炆10-12分鐘即成。如有蔥花,上碟前洒上。
註:
一. 梅菜分甜梅菜及咸梅菜,亦有分梅菜(多葉)及梅菜心,我通常會買甜梅菜心食。即使是甜梅菜心,我都覺得太咸,所以我會一次過在水喉下將沙沖洗乾淨,再浸一會(可試吓咸味),切碎。然後放白鑊烘乾,再加入糖及麻油煮過(試啱味),攤凍放雪柜備用。
二. 即使製過的梅菜,各人口味也不同,所以調味方面仍需自己調節一吓。
我唔食梅菜!唔想變霉蔡!
我食甜梅菜。