豬仔糖水

紅磡小小一個社區，食肆多多。除了韓流之外，甜品店亦不少，幾條街數埋數埋都有十間八間，但係真係企得住腳嘅當數「芝麻綠豆」，響呢區開左十幾年，其他糖水店，冇咩邊間有超過三年歷史。

去年附近開了一間「豬仔糖水」，初開業時我試過一次，覺得唔錯！其後都冇再去。早兩晚與舊同事食完晚飯過去食甜品；尋日上海個姪女來港，晚飯後佢話想食糖水，我建議佢試吓呢間，有啲新鮮感。

綜合兩晚食左嘅糖水：

一. 豆茸冰島

二. 抹茶冰川

三. 桂花芋丸薯丸

四. 紅豆椰汁豆腐花

五. 洛神雪莓戀

六. 太空漫遊

七. 椰皇芋丸湯丸

八. 椰林燉奶

九. 抹茶栗子慕斯

此店款式與「芝麻綠豆」完全不同，賣相唔錯：唔食得都睇得！我祇食過一，二同四，感覺上呢度嘅甜品唔太甜，今次試一與二，佢啲綿花冰唔甜，咁大碗食完都唔覺得「漏」，亦唔飽(即使剛食完晚飯)。