好眉好貌生沙蝨--皇后冰室

早幾個月，屋企附近開左間「皇后冰室」，我見佢門口都幾企理，但係因為用左暗色玻璃橱窗，望唔倒裡面咩嘢環境，心裡面一直諗住搵機會要試試。

但每次經過，無論早餐或午餐時份，即使係閒日，門口都大排長龍。我份人最怕排隊，所以寧願搵啲有訂檯服務嘅食肆。早幾日相約舊同事食晚飯，我見有六個人，咪諗住試吓佢，還自己嘅心願囉！誰知打電話去問，佢地答冇訂檯服務，結果咪去左食韓燒囉！

上海個姪女前日到港，我尋日北上開個唱，唔得閒理佢。今早一齊落街食早餐，咦！少有喎，「皇后冰室」竟然冇人排隊，咪即刻入去試試囉！

門口睇落：OK架！啲英文俾人感覺佢嘅市場定位最起碼都應該係行中上路線。

門口嘅大餐牌，咁似「太興」嘅！

室內佈置：扮懷舊(影出嚟光鮮左、靚左---實際上係非常殘舊)！可能全部係拾荒(註)而來，姪女話係田園feel喎。心中當堂慶幸佢冇訂檯服務，否則果晚食完同事可能心中抱怨。

呢個係我食嘅「營養早餐」：蒜茸牛油多士、德國腸、煙肉。蒜茸牛油多士肯定冇落蒜茸，多士又凍又靱，兩字記之曰：難食！西式煎煙肉應該係煎到脆脆地、捲埋嘅，佢片煙肉好似冇煎過咁！德國腸現成入貨，都冇咩嘢理由可以失手啦！至於雙蛋煎成點，有板你睇啦(我冇講過要咩嘢蛋架！不過，佢都冇問)：

迷你奶茶：

姪女食嘅「歐陸早餐」：德國腸、餐肉蛋公仔麵(不中不西)配番茄湯底。佢片餐肉薄到風吹得起。嚟果陣嘅賣相：係咪連茶餐廳都不如呢？

有陣時食物質素麻麻地，服務好都可以接受；偏偏此店兩樣均欠奉！我地入左去決定左食咩嘢之後，不斷示意侍應生都冇人理會，幾經艱苦其中一個女侍應終於走埋嚟問我地：「要咩嘢？」我地都未開口，可能有其他人叫佢，佢連「唔好意思...」都冇講又行開左。

等左一陣，佢返番嚟，同一副晚娘面孔：「要咩嘢？」嘩！呢種服務衰過一般茶餐廳。

落完柯打，久不久有其他侍應走埋嚟問：「係咪叫左咖啡？」、「係咪你嘅？」....全部都唔係囉！佢地點落單架，駛唔駛啲客自己去認領食物呀？

此店唔知係咪家爺仔乸生意呢？全店幾位女侍應都係清一色晚娘面孔，祇得惟一一位男性侍應正常啲。我必須強調，人地做食肆啫，唔係賣笑，佢唔笑唔係罪過；好似我咁，生得個樣衰，我自己都冇法子架！但係你講說話，別人便可以從你談吐得知你個人係咪好似你個樣咁cool、咁衰囉！但係此店的女侍樣，無論樣貌、談吐一樣入形入格----人地貫徹始終，好過你表裡不一吖！

何解我咁講？侍應拎食物俾姪女果陣，成把刀(刀尖向下)跌落姪女個坐位度，果位侍應一句說話都唔講就走左。

姪女問我：「佢究竟知唔知把刀跌左落嚟？」

我：「佢一定知有嘢跌落嚟，不過佢可能唔知係一把尖刀！好彩你坐得埋咋，唔係就攞刀拮大睥啦！」

姪女：「如果真係拮倒我會點？」

我：「我估佢頂多係唔收你呢餐錢。」

我地食完早餐，行左一轉，響十點半再返轉頭見佢門口一樣冇人排隊！奇怪，今日係假期喎！我相信之前咁多人排隊得兩個可能：

一. 佢俾左錢搵人做「妹」；

二. 人人好似我咁，鍾意試新。

不過咁嘅食物、咁嘅服務，衰過一般茶餐廳同兩大快餐連鎖店，抱歉，我絕對絕對唔會有下次！可能光顧過嘅人都好似我咁諗，佢風光不再啦(如果佢早幾個月真係風光、而唔係做「妹」的話)。

註：

拾荒：

拾荒，俗稱撿破爛，指從他人所棄置的物品當中，拾取仍可使用的物品自用或轉售的行為。