牛角日本燒肉專門店(旺角)

早兩晚都約左舊同事/朋友食飯，尋晚響旺角瓊華中心「牛角」食。

我之前響網誌經已介紹過黃埔分店，今次因為四個人分別來自香港、九龍同新界，最方便當然係選響旺角食啦！

四個人除了我之外，其他人都未試過呢間食肆。如果響星期五、六、日，此店有限時間---由入座起計，食兩小時。但尋日係星期二，訂座時我問明有冇時限，店員答左冇；因為食飯兩小時足夠，但係我地兩個月先聚一次，梗係雞啄唔斷啦，結果七點食到十點半。

我地幾個人勝在唔揀飲擇食：牛、羊、豬、雞、魷魚....食得落肚嘅都試，好豐富亦好滿意嘅一餐：

一. 海蜇柚子醋沙律$48

     好醒胃嘅沙律，因為用醋而唔係沙律醬，食多多都唔怕肥！

二. 燒肉五品盛盒$198

    因為朋友都係第一次嚟，所以我建議叫呢個盛盒，貪佢咩嘢都有啲；食完想「安哥」嘅咪再柯打鐘意食果啲囉！(有牛腹肉、牛肩肉、牛脷、雞脾肉、豬頸肉、粟米、鮮冬菇)如果食得講究嘅，咪單叫和牛囉！

三. 魷魚$38

店員拎嚟果陣，囑咐我地唔好剪開佢，因為水份多，剪開才燒有機會俾水彈倒；燒兩分鐘再剪開，如果肉轉白色代表熟，否則再燒一會。成隻魷魚最好食係果兩片翼同啲鬚---特別爽脆！

四. 廣島蠔$58四隻

蠔差不多係必叫食物。蠔味好香！

五. 茄子$22

    又唔記得影相

六. 南瓜$22

     燒左一半至記得影相

七. 香草羊鞍$98兩件

     我地叫左兩客四件，大大件！我地原本都鐘意較生，但係都煮到熟晒(好快熟)。我地一致覺得羊鞍最好食，即使全熟，一點也不靱。正因為太好食，顧住食又唔記得影相。

八. 海鮮燒餅$68

九. 豬頸肉$45

     呢份係盛盒內有而加叫嘅肉食，證明好好食啦！

十. 丹麥雞胸肉$45

     盛盒內果啲係雞脾肉，朋友額外叫個雞胸肉。

十一. Asahi生啤500ml$38

        我地四個人，三女一男，得個男人唔飲得酒(佢飲得都唔俾佢飲啦！容咩易佢咋醉行兇架)；三個女人分飲500ml，幾cheap！

十二. 拌菜牛肉飯(付昆布湯)$56

    好味！不過個昆布湯太鹹----成餐飯美中不足之處！

十三. 石鍋香蔥拉麵$46

拉麵好滑！不過朋友說在日本食同一樣拉麵，上面鋪滿蔥；所以嫌佢蔥太少！又唔記得影啦。

十四. 鱈魚腸豆腐$38

豆腐上面鋪左一啲泡菜拌雪魚腸嘅嘢。我唔食泡菜，所以試都冇試；朋友食左都冇咩嘢好評！應該都唔太好食。

十五. 鯛魚燒(紅豆)$32兩條

十六. 雪糕銅鑼燒(抹茶)$29一件

咁少甜品四個人分嚟食---少吃一定多滋味架！

我地一致認為羊鞍、豬頸肉、蠔同沙律最好食！

餐廳好窩心，為顧客提供電話袋及抹布。

黃埔分店服務唔錯！不過相比之下，呢間分店服務更優勝----店鋪大、人手多，但個個都好耐心答覆顧客提問。

埋單一千一百幾，我地都覺得抵食---平均每人唔駛三百！好過食自助餐：可以揀自己喜歡嘅嘢食吖馬！