麗姐廚房
剛過左去嘅星期一,舊同事約左響呢度食晚飯。初時以為係素食私房菜,原來唔係。
我地又係四個人,兩位響度食過午飯,覺得都可以,於是咪約響呢度食囉!我份人葷又食、素又食,反正未試過,冇所謂啦!今次有人做東:舊同事去年升級,約左請食飯,但當晚我臨時有急事去唔倒,舊同事堅持今餐再請(平時我地係AA制),咁又卻之不恭啦!
果日就充實啦:朝早九點去旺角抽血、十一點響同一座大廈洗牙、一點至五點深水埗唱局、七點晚飯!一早抽血,攪成咁:
如果去醫院抽,攪成咁都無話可說;私家專科診所,都攪成咁!隔日覆診,我問醫生:「你認為可唔可以接受?」
醫生:「好難講架!間中我同人抽都會架。」醫生攪成咁又唔出奇喎!佢地少練習吖馬。
果晚我如常第一個到達菜館,食肆在二樓,冇咩裝修,格局似間低級茶餐廳(與太興、翠華冇得揮),可能因為食素,所以樸素一點掛。再見擡上放著菜牌---咁即係唔係私房菜啦!私房菜冇得你揀,煮到嚟就要食!唔食得唔得?得!不過錢照俾。
人齊後,做東位果舊同事覺得選「麗姐推介」最簡單,唔駛諗!於是叫左:
(電話冇電---油錐影唔倒!呢兩個前菜都影到變色)
青瓜雲耳、茄子。茄子一睇就知係辣架啦!我冇試。青瓜雲耳OK,係冇咩嘢味啫。
一. 雜菇燉湯:
個湯係唯一一樣我地一致讚賞嘅:有猴頭菇、雞脾菇、蟲草花、茶樹菇、鷹咀豆、腰果
二. 牛油果吞拿魚卷
餸菜中呢樣算是比較好食,不過同「日式加州卷」比,當然冇得比啦!
三. 豉汁油錐煲
影唔倒!睇落就係「豉汁冬菇煲」。平時食「素鱔」,佢嘅外形同味道都幾可亂真!但係呢味所謂「油錐」,無論形同味都差好遠!結果同事都忍唔住叫侍應埋嚟:「呢個煲好唔掂當喎!」
四. 越式春卷
越式春卷有兩種,一種是炸過,一種用米紙卷住食!好明顯呢個係用米紙包果種,除此之外,我地都唔覺得佢有邊樣似越南嘢:中間白色果舊我地估係蒟蒻,旁邊應該係紫椰菜。
外形唔錯,但係食落勝瓜太生,啲湯淨係得胡椒粉同薑味!
六. 合桃糊、杏仁糊
一見倒個合桃糊,我地都覺得有驚喜:賣相好得!但係食入口,杏仁糊啲粉未混好,一舊舊;放上面嘅合桃有點諗,合桃糊亦唔覺有合桃味----極之失敗!
埋單七百幾。
我諗呢度惟一值得讚嘅係服務囉!另一位與我一樣第一次嚟食嘅舊同事評語係:「我唔會嚟第二次!」(我都係咁話)另外兩位:「第一次嚟係食晏,當時都覺得OK,但今次真係好唔OK!」
為左唔想一次定佢生死(因為侍應服務唔錯,而且我地人少,叫嘅野唔多,可能我地唔識叫啫)。第二天遇著位住香港島、兼且係食長齋嘅朋友,問佢有冇去呢間食過?佢即答:唔好食!
我:咁香港有邊間好?
答:我喜歡崇光附近間「大自然」。
星期二晚與朋友去「牛角」食,咁啱其中一位三年前食過;佢忘記食過咩嘢,祇記得唔會考慮再去果度食!咁樣講法,此店開左都有幾年,以咁嘅質素都企得住腳?
所以依定啲新紮年青人,都咪話唔得人驚----不學無術!
嘩,抽成咁,投訴佢,昨天我抽都唔係咁。
拮落嚟都知佢吾掂!我一向抽血都冇問題。果位護士新嚟既,雖然医生咁講,但如果其他病人都有咁嘅問題,我估佢都要正視吓!
嘩!抽血抽成咁都得?咪好痛囉?
食物唔接受,睇完唔會去果度食。
私家診所抽血抽成咁唔接受,果個抽血員唔合格!
傷口真係幾恐怖啊!