廉宜版「佛跳牆」

佛跳牆：聽倒個名都覺得貴！祇是落啲咩嘢料，真係豐儉由人。

我呢個佛跳牆：鮑魚？冇播；海參？冇播；魚翅？都冇播！咁又點算係佛跳牆呀。

以上三種，除左鮑魚，其他材料都係冇味嘅！食翅又好、食海參都好，最緊要係個湯底啫！所以以上所有材料都唔重要，最緊要係有：

金華火腰、瘦肉同雞。

材料：

新鮮全雞翼兩隻

雞腳5-6隻

瘦肉半斤切大粒

發透魚肚(多少隨意，反正佢冇味，多少都唔會影響味道)

金華火腿一舊切粒(不可過多，會太咸)

竹笙切段(又係多少隨意，反正佢冇味，多少都唔會影響味道)

姬松茸菇幾隻(唔鍾意嘅咪用冬菇囉)

                          以上材料全部飛水

薑一舊

我用左真空煲，貪佢煲好多係咁多水。先煲滾適量水，下所有材料煲滾，轉中火煲10分鐘，移到真空外膽內，蓋上待兩小時。

飲時可再煲一會。

雖說是廉宜版，其實也不便宜，加埋加埋都百幾蚊(我煲得少喎，又睇你用咩嘢質素嘅花膠)。捨得嘅咪加埋魚翅、海參、鮑魚、瑤柱囉！