勝在夠賤！
2015/06/15 10:50:39 網誌分類: 時事
長毛早兩日發表國家出一億，叫佢華麗轉身，響星期三轉軑言論。當時我第一個響FB反應係：
如果真係駛一億，咁就買起佢便宜D！
唔係咩？收得肥佬錢亂港嘅嘢，你同樣用錢收買佢有用咩？要收買、都收買個誠信好啲架！不過，我又真係諗唔出有邊個囉。
事隔一日，佢出嚟澄清啦：
公民講場：長毛冇句真失信於民
社民連立法會議員梁國雄（長毛）前日言之鑿鑿話有人開價一億元，換取佢支持政改，點知尋日畀行政會議成員張志剛「大一大」，就即刻好似食咗誠實豆沙包咁，澄清只係有人話佢支持政改可以得到「兩世無憂」嘅錢，至於開價一億元其實只不過係佢自己個人老作囉。不過，就算件事真係好似長毛所講有一部分係真，只有金額係假，相信都唔會再有人信佢，事關佢經過今次已經誠信破產(佢之前有誠信咩？)。雖然成功吸引傳媒報道，但係就失去咗市民對佢嘅信任，長毛今次都真係因小失大喇！
其實，可能佢自己以為佢果票值一億掛；於是開個價出嚟，睇吓有冇市場都未定！不過，佢真係認真高估自己咯，佢以為通過「政改」對阿爺嚟講真係咁重要？
對普羅大眾嚟講，最緊要係安居樂業啫，香港冇佢呢類嘢攪攪震，咁就還得神落。
咁啱星期六晚「新城電台」晚上phone-in節目，便是請聽眾發表吓：如果政改唔通過，市呢民有何損失？
拋出呢個題目，係因為近排好幾位城中富豪分別出口術，講到如果「政改」唔通過，全港市民都傷亡慘重：樓市、股市都會大跌咁話。
都話係口術啦，「政改」唔通過又如何？我早兩日都講左啦，佢地攪到咁，咪唔好通過囉！Who cares？(邊個會關心)雖然我冇得投票選特首，但係要香港人再捱幾十日要運路走先返倒屋企、要警察日以繼夜(唔係捉賊)看住班無聊但係隨時會發難嘅嘢，我於心不忍！
當晚大部份聽眾都表示，「政改」應該通過唔倒。不過，冇人表示擔心喎！香港良好市民最緊要有工做、有飯食啫。咁咪好囉：佢地要再「佔領」又出師無名！五十年不變，大家集中精神攪好民生，以後都唔好再提「政改」咯，等CY繼續做落去啦！
回應 (0)
我要發表