人心？就是難測！

建制派WhatsApp事件如深水炸彈，炸得他們傷皮掉骨，高人話，事件睇到從政的道德幾咁重要。

高人總結成件事，話有幾點體會。

第一是要來的總是要來，遮遮掩掩是阿Q精神。物極必反，看清了建制內的腐臭在哪裡，決心根治，肌體才可健康成長，建制派才可以更加成熟。

二是內在的破壞力引發震盪後，反而會激勵建制派加強團結。

三是讓有志從政者從中吸取教訓，明白政治道德是政治人物必須具備的條件，若沒有政治倫理，他的從政之路已經走到盡頭。

四是歷史上中國人最痛恨的是漢奸，今天他可以出賣一同打拼的朋友，明天他想投向對方，相信也不會有容身之地。

高人話從積極角度睇事件，未必係壞事，就係成日講的置之死地而後生啦。

聽完高人咁講，都知道會認真對侍此事件。

【巴士的報】2015-06-25 評論

*****************************

建制派whatsapp群組對話曝光，我祇跟進著事件的發展而未有表達意見，因為我認為報章一定仍保留了另一些資料，一定留有後著！就像檢察官盤問疑犯一樣，一步一步放料迫使疑犯講出真相。

當然，睇倒呢個報導，首先係擔心whatsapp 與facebook呢類社交群組嘅保密程度。facebook一向差！所以，上載facebook嘅資料一定係可以公開嘅(唔好諗住淨係俾幾個自己人知！因為藤連瓜、瓜連藤，好容易就全世界都知)。君不見有人因請病假，之後上載左同一日去旅行嘅照片響facebook，展轉俾老板知道而炒魷；君不見有人上載艷照上facebook，其後認識左男友，第一時間刪除艷照，但係冇諗過有朋友之前tag左佢張相而最終曝光....

至於whatspp群組對話被公開，假設whatsapp內部冇人涉露資料(係都幾得人驚)，咁能夠將資料涉露嘅一定係群組裡面嘅人。首先最值得懷疑嘅一定係響呢個重要關頭不發一言那些人。何解？佢地諗住會公開資料，更係唔會俾人知佢諗咩嘢、講過咩嘢啦！看了第一天的報導，心裡便有個疑問，何解某幾個人冇加入意見？

追左兩日，終於知道原來有某些建制派議員因為某些原因，並冇加入此群組，咁即係話佢地一定唔會係二五仔。

再諗吓：事件曝光，對誰最不利？受害人當然唔會蠢到拎自己對鞋，掟自己對腳！係政府先至會蠢到養個「香港電台」嚟倒自己米嘅啫！所以，明顯係受害人果個又可以洗脫嫌疑。

既然咁講，好自然又要諗吓：某人受害，咁何人會得益呢？

再諗深吓：即使有發言果啲議員，如果講嘅嘢純屬敷衍，公開左都無傷大雅嘅，咁咪一樣有嫌疑囉！

歸根究底，人心難測！

講就易者！從政者要有政治道德---你試吓俾一億佢睇佢會唔會出賣你、出賣香港、甚至出賣國家？一百幾十萬都可以買起幾個啦！