通脹失控必引發衰退
2007/11/22 11:01:21 網誌分類: 經濟
1980年雪茄伏為控制通脹，不惜將利率提升至20厘（當年CPI升幅只有16％），雖然引發1981-82年衰退，但換回1983年起美國長期通脹率受控制。1994年1月上海朱亦咬實牙根將人民幣同美元併軌，1美元兌8.7元人民幣，以後許升不許跌，1994年10月人民幣利率升上15厘亦唔理。中國CPI洪峰1994年10月過後，1995年起中國通脹率回落。
2001年「九．一一慘劇」，美國為防止衰退（2001年第三季GDP已出現負增長），不惜將利率一減再減，到2003年6月減至1厘，通脹呢頭猛獸因此重獲自由。今年8月17日聯儲局面對次按危機又急急減貼現率及注資，令通脹呢頭猛獸再肆無忌憚矣。中國2005年7月起雖然讓人民幣升值，但慢郎中嘅動作令中國通脹率漸漸唔受控制。通脹率唔受控制最終必引發經濟衰退（好簡單嘅Boom and Bust理論）。世人皆怕痛，而忘記no pain no gain嘅教訓。嚴父出孝子，慈母多敗兒。當油價升穿100美元時，你說怎麼辦？當個仔已做咗蠱惑仔，到時後悔已太遲。
今年9月開始，美國七千七百萬戰後嬰兒開始陸續退休。退休人士會做乜？一、賣掉城市住宅，搬到小鎮居住，令美國大城市樓價面對壓力。二、股票投資唔再增加，開始增持債券、收利息作為生活費，即未來美股面對較多沽家、較少買家；反之，債券可能出現較多買家（退休人士投資策略改為保守）。美國物業方面大方向去年已改變，美股大方向係咪今年10月起改變？
1976至80年美國財政部及IMF共拋售一千二百噸黃金，1978年4月IMF宣布推出紙黃金，一樣無法阻止上世紀九十年代金價上升。一旦信貸危機形成，聯儲局亦一樣無法阻止佢蔓延；政府唔係萬能嘅。當恒生指數响11月份形成一浪低於一浪後，淡市莫估底，因為你唔知、我唔知個底响邊，無謂亂估。所有預測，95％都係睇錯市。
近年中國同印度經濟興旺，令全球食品需求以每年30-40％速度上升（由穀物為主轉為多食肉嘅結果）；加上今年全球第七大小麥出口國澳洲出現乾旱，令小麥今年產量減少60％。2008年拉妮娜現象，令美國產麥區陷入乾旱，明年小麥價進一步推高機會極大；再加上化肥乃石油副產品（不過只佔農產品成本0.18％）。近日小麥價回落，相信只係秋收嘅結果，明年春季進一步大升機會極大。
中國商務部公布，全國肉類、食用油、蔬菜價格等均有唔同程度嘅上漲。其中豬肉批發價格連續六周上漲，上周豬肉價升1.6％、牛肉價升1.2％、羊肉價升1.3％、食用油漲1.9％、豆油升2％、花生油升1.8％。近期美元走軟，加上天氣轉冷，連菜價上周亦升1.6％。預計短期內肉價、油價及菜價將繼續上升。
加息點令豬肉供應增加？
中國境內農民面對可耕地萎縮，卻要求糧食增產，結果形成濫用化肥，污染大地。大量農民湧入城市，令城市樓價升完又升、漲完又漲。政府政策卻係限制土地供應去打擊樓價上升，後果係阿崩叫狗，愈叫愈走。內地中產階級冒起，但又缺乏投資項目，結果將A股炒到半天高，港股直通車又遲遲唔准開出。過去中國人窮，有餐飽飯食已好開心；依家富起來，人人想吃肉，此乃十分正常嘅要求，可惜養豬業仍未現代化，搞到今年豬肉價上漲60％，刺激CPI上升。人行希望透過加息去壓抑通脹（點樣透過加息令豬肉供應增加？真係晒頭）。為刺激豬肉增產，飼料價上升，於是玉米又漲價，國家卻唔准企業用玉米去生產乙醇，令呢類投資者泡湯，結果愈搞愈糊塗，搞到唔似自由經濟，但又唔係計劃經濟。
中國七億五千萬農民人口，卻無法產生足夠食物養活十三億中國人口；反之，美國六百萬農民，不但養活美國三億人口，而且有大量糧食出口。中國唔少產區欠缺交通工具，令農產品運唔出去；交通良好嘅農田為咗一再增產（動用大量化肥），結果良田漸變成瘦地。過去三十年中國工業現代化，農業則冇變化，仍停留喺包產到戶水平，形成中國城鄉經濟兩極化。中國政府日後要做嘅事係將農業現代化。
希臘人的智慧──男人一生最大嘅詛咒係娶一個較自己聰明嘅女性為太太，結果自己所做一切响妻子眼中不值一哂。為證明自己，男人一生努力，結果仍畀太太睇唔起。男性需要嘅只係一位賢妻良母，一個曉打理家務、有D崇拜自己丈夫（其實自己好普通）及曉教導子女嘅女性，便一生幸福。除非你想做蘇格拉底，因被妻子嘲笑，結果成為哲學家。投資同娶妻一樣，如不量力而為，痛苦一生。
昨天本欄第三段文中指恒指由10月30日31958點回落至今，應為回落5552點，跌幅17.37%，合此更正。