芽莊越南菜館

尋晚我地「四人邦」群組晚飯聚餐，選了時代廣場十三字「芽莊」越南菜館。選擇此店是我個人喜好，因為我喜歡食越南嘢，特別係「鴨仔蛋」，可惜現今此食身已消失！

我曾經光顧灣仔胡忠大廈「芽莊」分店，覺得食物唔錯。今次去時代廣場，係因為就大家方便啫！

我地四個人，安排左張四方檯。如果一次過叫晒所有食物，真係放都放唔落，所以我地逐味叫，咁樣可以慢慢食--食完一樣又一樣。

一. 前菜：安南藕苗蝦沙律

     單睇菜牌上照片，還以為是通粉沙律。正因為好奇，加上四個人都未食過，一於柯打嚟試吓啦！

雖然影得好朦，但係細心睇，都睇倒蓮藕苗好像蓮藕一樣，中間是通窿的，好得意！越式與泰式一樣，沙律都加醋；雖然我個人唔太喜歡食酸嘢，但係我地四個人一致認為呢味沙律好食，但係啲蝦冇咩嘢味！下次我地叫呢個沙律，可唔可以唔要蝦，要佢加多啲藕苗呢吓？

二. 鑊仔煎薄餅：蛋外皮，餡是洋蔥、芽菜同瘦肉片，配一小籃越式香菜。

     我唔喜歡醮醬料食，所以覺得淡左啲！不過佢啲香菜真係令我地大開眼界，除左我熟悉嘅香花菜、九層塔、生菜、青瓜、紫蘇葉，居然有樣未見過嘅：

(更難得嘅係原來我地四個

個人都鍾意食呢啲香菜)上角淺綠色，好似片芥菜葉果片----嘩！一試：死啦，好似食緊日本青芥咁！另一位豬朋：「冇嘢呀！我剛剛至食過。」我：「你有冇攪錯呀！你味蕾反應遲鈍呀。」佢再試真啲，真係有青芥味！鍾意食日本青芥嘅咪鍾意食囉----可能真係日本青芥嘅葉都未定！

三. 越式札肉粉卷：通常一碟四件，我地四個人剛剛好。雖然我唔喜歡醮醬汁食嘢，但係食粉卷一定要加越南魚露。粉卷皮好滑。

四. 生熟牛肉河粉：越南食品代表作！熟牛肉用上牛展，好稔滑；反而生牛肉無咩嘢味！湯底唔錯。此外，此店用的是金邊粉，偏硬亦唔滑，我地一致覺得河粉失分！

五. 燒釀魷魚：我地初時以為係釀左飯或者糯米飯，完來錯了，裡面是木耳、札肉、蛋之類嘅嘢，一粒飯都冇！都幾好食。

六. 香茅燒魚：睇菜牌個賣相靚好多！雖然都好食，但係我覺得佢$118偏胥---呢條魚響貴市買，即使係游緊水嘅，都唔駛三十蚊！

埋單：$576。原本想叫甜品食，但係此店獨孤一味甜品，唔啱我地！反正友人有駕車，一於過紅磡「豬仔糖水」食甜品----順便送我返屋企。

一. 海底椰紫米露

二. 太空漫遊

三. 抹茶慕絲

四. 朱古力心太軟

埋單：$127