「愛回家」死唔斷氣！

我相信記憶中「歡樂今宵」至今仍是「無線」惟一長壽節目。至於「愛回家」，雖然拍左幾百集，受歡迎程度與「歡樂今宵」無得揮，加上劇中人物並不討好，因此觀眾估計，套劇應該係時候告別。

但係，有高層可能要維護自己「樽鹽」，所以公開宣佈冇打算腰斬呢套劇，但係據聞劇中人物亦不如幕前相親相愛(其實我一向覺得即使係幕前，佢地都唔見得相親相愛！佢地個個都有問題，最離譜咪係馬壯同馬柔囉)，高層想保都保唔住。但係又講左唔會腰斬咯，咁如何是好？

於是，咪嚟個借屍還魂囉！基本上「愛回家」嘅人物大部份唔見晒，但係最慘有幾個又留番響度，演另一些角色.....於是，觀眾真係要定一定神，唔係「回家」，係要「回吓魂」才知發生咩嘢事。

依家根本上係另一套劇，「無線」死唔肯宣佈佢壽終正寢可能想日後製造佢成為另一個長壽節目也未定！

如果一套劇嘅中心人物冇左、目標家庭冇左，都還算是同一個節目的話，咁樣「新聞報導」咪係長壽節目囉---永遠唔會完！

為左用人惟親，「無線」依家用來用去都係果幾個(有位仁姐，套套劇髮型不變，衣著不變，喜歡著長裙！可惜吖，長裙唔係人人carry得倒；佢著起長裙似C奶多啲)！可能唔親嘅都自動走頭、唔走嘅「無線」亦唔同你續約----冇人用咪大條道理用果幾個囉！我諗遲啲一定會安插個角色俾蕭正楠！

早兩日「四人邦」飯聚，我問舊同事有冇睇「武則天」。佢一向少睇電視，但佢竟然話佢有睇喎！我問：「吓！你竟然會睇？」

同事：「係呀！果陣咁啱放工返到屋企，依家又冇第二個台可以選擇咯，咪惟有睇佢囉！不過，都冇坐定定睇，祇係開住部電視，間中望吓囉！」

噢！難怪，就係因為冇得揀，所以「武則天」都有高收視；但係如果將來有得揀，咁.......