la terrazza bar & grill

馮京作馬涼！

剛過去嘅星期日，姪孫響沙田大會堂演日場折子戲。尋日都講左，姪孫響美國住，今次應邀來港匯演，佢阿媽(即係我嘅姪新抱)梗係叫晒香港啲親朋戚友嚟捧場啦！但係佢地上星期六零晨才抵港，所以入埸劵要響現場派發。

果日姪新抱與姪孫一早要到場化妝，所以等人與分發入場劵嘅重任交左俾我姪女(姪新抱嘅親戚我唔認識)。姪女與我及另一位友人相約響沙田食晏，諗住響大會堂裡面嘅咖啡室食，一邊食、一邊等人囉！

我地上午十一點三去到，才知道我地訂檯果間並非響大會堂裡面間餐廳，而係響附近嘅一間意大利餐廳la terrazza bar & grill，而大會堂果間叫 la terrazza caffe---一字之差！(我初時聽倒姪女告知訂左位，我都奇怪：果度有得訂位嘅咩？)

根據咖啡室侍應指示，去到呢間餐廳：(響美心酒樓旁邊樓梯上，真係唔講都唔知別有天地！)

吓！露天茶座？想熱死/晒死人咩？

噢！原來有間室內玻璃屋，咁都冇咁驚！

午餐餐牌：(久不久會轉吓)

一. 青檸蜂蜜茶(唔飲嘅就要另外柯打啦)

二. 餐飽配橄欖油/黑醋

三. 主菜有十幾款可供任揀(不同價錢$100-200)

甜品、餐湯另外加錢。

青檸蜂蜜茶：個人幾鍾意--唔甜！因應個人需要，可以要少冰、少甜。

餐飽：論外形，白色唔討好！不過，食落又唔錯：外鬆脆、內軟，撕開左仲出煙！醮黑醋、橄欖油食，正！

我叫嘅「鮮果大蝦沙律」$108

啲芒果好熟、好甜！我喜歡佢冇落太多沙律醬(怕肥囉)

姪女朋友叫左： 「魚配薯蓉」

姪女叫嘅「慢煮牛尾配寬條麵」：有四件牛尾，姪女分左一件俾我試。佢認為牛尾未夠稔，但我覺得OK，西式煮法唔似得中國人咁，要炆到稔稔爛爛嚟食：賣相唔好！而且，牛尾亦入晒味。所以話啫，口味人人不同，好難一概而論。不過，啲甘筍好食過牛尾。

以咁嘅環境、咁嘅食物質素，我地都認為係超值！此店亦唔似得一般意大利餐廳咁，食得拘謹，我地見好多人一家大細嚟食！

尋日中小學退休校長聚餐。其中一位校長居於沙田，我問佢知唔知呢間餐廳？原來佢都食過，亦覺得佢質素同環境好！不過，佢亦未試過此處的晚餐；據講仲可以響出面露天燒烤添！