鮮茄燴豬脷

原食譜用的是牛脷，但現今很多人香港人戒食牛，況且牛脷很大條，即使一家人一餐都食唔晒，所以我改左用豬脷，一家四口剛好，而且豬脷很便宜，呢條十二蚊。

材料：

豬脷一條，清潔好並去除碎骨

洋蔥一小個切絲

蒜茸4瓣

熟番茄兩大個切件(講究啲咪去左皮先囉)

混合香料(mixed herbs)半湯匙

香葉2片

糖1湯匙

鹽半茶匙

白胡椒(可以薑蔥代替)

一. 豬脷先飛水2-3分鐘。再煲一鍋水(蓋過豬脷)，內加十多粒白胡椒(去豬肉騷味)，下豬脷煲滾，收細火煮1小時(間中檢查吓，夠稔便可)。

二. 將豬脷上白色厚皮撕去，切片。

三. 燒4湯匙橄欖油炒洋蔥至軟，下蒜茸炒一會，加入香葉、混合香料、番茄及少許水煮滾，慢火燴15分鐘，下鹽、糖調味，試啱味下豬脷，再煮2-3分鐘即成。上碟前可埋生粉芡(個人唔喜歡，所以冇落)。