有得揀，你點揀？

單睇呢個標題，大家梗係以為我又講政治。政治有咩嘢好講吖，響政海浮沉幾十年，最討厭政治(做果行、厭果行係人類通病)！話雖如此，即使我討厭政治，我係一個對工作百份百忠誠嘅人，即使我唔鐘意，我都會盡力做好我份工！哼，好學唔學，學「貪曾」？

人生在世，其實分分秒秒都面臨抉擇---早餐食咩？去邊度食？今晚食咩餸？跟住去邊度？搭咩嘢車...祇不過呢啲常規動作，大家習以為常，唔覺得在不知不覺中經已作出抉擇！

小事如食咩嘢餸，冇咩嘢對錯可言：我比較簡單，每餐一定有一碟菜加一種肉。不過，即使係菜都有好多選擇！

大事如果錯左就大件事：婚姻、事業、選賢.....有陣時即使你幾小心，一樣會錯！祇能聽多啲、知多啲、自己又加以分析---獨立思考(critical thinking)好重要、從失敗中吸取教訓更重要。

唔講大事，咁講吓日常小事：買餸！

椰漿：

我鍾意用椰漿，煮咖哩、喇沙、椰汁餸及某些甜品必需材料。超市有罐裝椰醬漿出售，分大小罐。但係好似我咁人少，往往一小罐椰醬漿一次祇用倒半罐，椰漿又唔襟留，亦冇理由餐餐用，因為椰醬漿膽固醇高。最近響「祥興」見倒有「迷你」椰醬漿賣，十蚊三包(65毫升)。外表幾得意，最緊要係以後唔駛浪費，每次用一包便足夠！當然，屋企人多便可選購罐裝椰漿。

白果：

打麻雀就怕食白果啫，平日我都幾鍾意食白果。上個月與豬朋竹戰，我都煲左「白果腐竹糖水」，四隻腳齊齊食白果，咁就冇問題啦！

不過，白果有微毒，一次不能食過量。

如果買有殼白果，有經驗嘅主婦都知，一斤去左殼唔知有冇半斤用得！近年街市有去左殼真空包裝白果賣，原來白果亦有大小包裝之分。

我響「街寶」買果種屬於大包，每包$9.90。不過，我建議大家都係去街市買細包嘅好，每包5蚊(圖示)，一家四口一次經已足夠。如果買大包，剩番果啲最好響兩星期內食埋，食前梗係要檢查吓有冇壞啦！

木瓜：

尋晚舊同事專登拎左一袋樹上摘嘅木瓜俾我，順理成章今日就煲木瓜湯啦！

揀木瓜，有青木瓜，有熟木瓜。據知，以煲湯嚟講，青木瓜較香、熟木瓜就夠甜，各取所需！平日我會選購青木瓜，今次既然有得揀咯，我用左一個青木瓜、一個熟木瓜，咁咪又香又甜又好味囉！

甘筍/青瓜：

有兩種甘筍，一種外面有泥、另一種便如下圖咁：好靚仔！煲湯買有泥果種，呢種靚仔祇宜做沙律、或者用嚟炆或炒餸，亦可當生果食！不過馬死落地行，凡事冇絕對，今日煲木瓜湯，見雪柜仲剩左呢兩條甘筍，一於煲埋佢啦！

青瓜一般可以作沙律生食。據講瓜頂仍保留有朵花果啲便代表夠新鮮。經驗所得，新鮮都唔一定爽脆！有次我買左下圖所見，一盒有十條八條青瓜嘅品種(頭頂冇花)，入口爽脆，絕對可以作沙律/生果用；即使用嚟炒都好好食！不過一盒對於我嚟講，又要食好多餐囉！

栗子：

近年亦有去左殼真空包裝栗子賣。今早經過「街寶」，見倒有去左半邊殼嘅栗子賣：11蚊一斤、20蚊兩斤！心思思想買一斤煲湯。但回心一諗：買一斤返屋企要做餐死去殼去衣，結果可能得番半斤，咁不如買真空果啲啦！結果響菜檔買左一包十二蚊，返屋企磅過約六兩。大家諗吓點揀啦！

筍：

筍係上海人家常菜，廣東人比較少食，認為筍濕毒。計我話，依家久不久便傳出某種食物有問題，所以食咩嘢都死，盡可能樣樣食啲啲，咁咪冇咁危險囉！

不過，即使喜歡食筍，我地都好少買嚟煮。因為好麻煩，新鮮筍不便宜，一斤除剩可能連四兩肉都冇。折衷辨法係買罐頭筍；我用過，不過一樣要切除啲較老嘅部份才可食用。

早前響「街寶」買左以下聲稱「有機筍」，一包不過十多塊錢，全部都係嫩筍，一點都冇嘥，喜歡食筍嘅朋友不妨一試！

人生樣樣嘢都有得揀，視乎你知唔知有得揀、又想點揀啫！