「遴選委員會」不二之選！

政府日前宣布成立遴選委員會，為下任平等機會委員會主席展開公開招聘，意味任內劣迹斑斑、醜聞不絕的現任主席周一嶽（周一鑊），九成九會在明年約滿後被叮走。咁到底當年係邊個無帶眼識人，向政府推薦「翻閹」「廢鑊」周一嶽呢？原來正是近期因副校長任命風波而搞到一身蟻的香港大學校務委員會主席梁智鴻！(其實佢未必係唔帶眼識人嘅，你估佢係「司祺」姐，一眼就睇得出果隻係人、定係鬼咩？)

外號「金刀梁」的梁智鴻，雖然醫術高明，但眼光就認真麻麻，揀完隻「廢鑊」，又揀「爛橙」；引薦港大法律學院前院長陳文敏升任副校長，搞到港大以至全香港都滿城風雨，爭議不斷。政府在今次平機會遴選程序中叮走金刀梁，可說是近年罕見的明智之舉。

平機會第五任主席鄧爾邦，任期尾段被揭行政混亂及大花筒醜聞，政府於是首次為揀選平機會主席成立遴選委員會。當年的委員會主席為深受「貪曾」前特首曾蔭權爵士器重的金刀梁，其餘兩名非官方委員為行政會議成員陳智思及當時未做運輸及房屋局局長的張炳良。結果委員會推薦了前高官林煥光接掌平機會，但林做唔夠幾年就轉了做行會召集人，令政府要再成立遴選委員會搵接班人。

第二屆遴選委員會又找了金刀梁做主席，非官方委員有兩名行會成員史美倫及周松崗，以及視障人士曾建平，結果推薦出與金刀梁同屬外科醫生、並且在醫管局共事過的前高官周一鑊，引起各界嘩然，質疑梁不避嫌明益老友，並導致平機會再次進入黑暗時代。

回看今次第三屆遴選委員會的組成，主席史美倫，非官方委員周松崗、陳智思及曾建平都是舊人，扣除已做官的張炳良，就唯獨是欠了金刀梁一個，原因相信不用畫公仔畫出腸了。歷史印證金刀梁次次揀錯人，千揀萬揀，不是廢鑊就是籮底爛橙，相信決定叮走他都是經過深思熟慮，希望唔好再添煩添亂喇！