今年第一次「蟹逅」

秋風起，除了三蛇肥之外，又是大閘蟹上市之時。可惜現時在香港欲嘗一隻血統純正的陽澄湖大閘蟹，比中獎還難，最佳方法還是親往陽澄湖畔，找家信譽好的餐廳，親選靚蟹吃個夠！不過，個人要求不高，而且大閘蟹膽固醇較一般蟹高，亦不適宜食過量；但係要買嚟自己整，冇理由買一隻半隻架，想俾人「秒」爆咩？如果祇係食一隻半隻，去上海館子食都得，但係果陣又唔單祇食蟹啫！

剛過去左嘅星期一，係我地網友一年一度聚會。地點是尖東「百樂酒店」食「華麗蟹逅」步飛；當晚可能因為並非假期，食客不多，加上部份客人祇是散叫，所以步飛食物選擇不多！不過，我食步非餂梗，食物多都冇用，最緊要有幾樣啱我食嘅精品啫！

步飛提供的食物----海鮮類(花螺、長腳蟹、蝦、藍青口)得蝦算係食得過！花螺硬、長腳蟹咸、藍青口冇鮮味。

正如我所講，食得唔多嘅，有幾樣好食、又啱食嘅就OK架啦：

那夜有三款湯選擇：燉冬菇花膠湯、水蟹番茄薯仔湯及酥皮龍蝦湯。我祇試過前兩樣----「哎呀大仔」最喜歡水蟹湯，但我覺得自己煲都煲倒咁嘅湯，冇咩嘢特別；我較喜歡燉湯，因為自己好少整燉湯飲；至於龍蝦湯，由於另一網友試過，太糊口，不試也罷！

剌身，我的至愛---當晚的剌身很新鮮，雖然款式唔多！

沙律選擇也不多！我試過「四季豆蟹柳」，蟹柳好咸(真係奇！蟹柳都可以咁咸嘅)，最終食番我最喜歡嘅火箭菜---不過，火箭菜都唔係咁新鮮，而且莖太長，好過冇得食咋！隔離空果個碗仔係「鵝肝雞沙律」，好食！

呢碟係「炸軟殼蟹」、「竹炭和牛漢堡」同「茄子三文魚」。三文魚好「鞋」，唔好食！和牛與普通牛肉冇分別，反而個竹炭飽仔軟淋淋好食；個人覺得軟殼蟹算OK，不過又有網友嫌佢略乾----但炸得唔乾身就會「淋」、跟住會「靱」喎！

既然叫做「華麗蟹逅」，所以每人分配倒一隻大閘蟹。我估有三至四兩重！雖然細細隻，但係都唔錯；食大閘蟹主要係食膏啫，佢有吖！

我地六個人，有五個人(除左「哎呀大仔」外，佢淨係食雀巢出品)都認為Movenpick雪糕最精彩---並有六款味道，我試左五款，另一款冇試因為冇晒！

雪糕以外，甜品最「正」係「蟹肉梳乎厘」，細細杯，一陣風咁就食完！不過，我食唔倒有蟹味。其他甜品如西餅、慕絲、火焰雪山.....我都冇試！食唔落。

我地基本上係搵地方聚聚兼吹水啫---食餐食左三個鐘，再落酒店大堂吹多一個鐘，咁就各自打道回府咯！