上湯浸勝瓜蟶子
2015/10/09 07:58:16 網誌分類: 食譜
最初接觸嘅係福建人家常所吃的蟶子,身上附著很多泥,為免清洗需時,從來沒有買來自己整。近呢十幾年,街市有兩種小蟶子---一種是福建人食開有泥果種、另一種在海鮮檔一兜兜賣,冇泥用水沖一沖便可煮嚟食,早前在我的食譜中介紹過。
香港人食嘢貪大,我小時候吃的瀨尿蟹蝦身形很小,依家瀨尿蝦登上龍門,體形亦大到有手脾咁巨形,價錢?梗係唔講得小啦---以兩計!
這些身型巨大的瀨尿蝦,據講自東南亞入口,同時亦有巨型蟶子,價錢當然也不便宜。尋日響街市海鮮檔見有中型身積嘅蟶子賣(我份人咁「忠」,梗係揀呢啲中等價錢、中等體積嘅嚟買----一斤$48,一束半斤$28。原本諗住買一束,事頭婆叫我買一斤;我話食唔去,佢話一斤得好少肉,咁又即管買一斤試吓:果然真係好少肉,不過好鮮甜、爽脆!我會再買嚟食。
材料:
中型蟶子(檔販會幫你劏埋,回家略清洗殘留的腸狀便可)
勝瓜半條切滾刀塊
浸透並飛水雲耳少許
上湯(有便用,冇便用水)
甘筍花幾片(有便落,裝飾啫)
蒜片一粒
一. 將蟶子肉用小刀從殼中起出,洗淨抹乾水。
二. 燒油爆蒜片,甘筍花、云耳,勝瓜,灒少許酒,下適量上湯,鹽約1/4茶匙煮至勝瓜開始透明。
三. 下蟶子,胡椒粉,見蟶子捲起(像煮鮮魷一樣)便可盛起。
註.
一. 今次條勝瓜好壯、好嫩,所以好快熟,連瓜核都冇!
二. 此餸易整又好味,冇可能會失敗!
回應 (0)
我要發表