中村籐吉香港店

美國的大佬和上海工作的姪女兩父女來港(昨日姪仔亦到港)，前天是為「食」日，午間響紅磡酒店中菜館飲完茶，姪女建議沿紅磡海傍行去尖沙咀，再乘車回紅磡，瀟灑走一回。晚上打邊爐。

我：「現時下午兩點，烈日當空，不如經行人隧道去尖東，晚一點才經尖沙咀海傍公園行回紅磡。須知道，我地呢啲年紀出去暴晒，好容易連屍斑都出埋！」

於是三人行至尖沙咀，那時是下午三時。姪女忽然說：The One有間好「正」嘅甜品店，假日人多到連籌都攞唔倒！今日係閒日，不如去試吓。大佬其實興趣不大，祇不過見女兒興致勃勃，一於捨命陪囡囡；我一向喜歡食甜品，當然冇異議。

原來姪女曾經來過，但係連籌都攞唔倒！何解？派晒囉！

來到門前，見倒張告示寫住要自己按機取籌。我們的籌號是120，當時叫到114。

睇個門口，以為係診所！

門外坐著一眾等候食客，大約有十五人左右。雖然我地祇是等五個籌，結果等左一個小時(四時)才有得入坐。

此店每位客人收取十蚊茶錢。茶是日本茶，唔錯！不過值唔值，自己衡量囉！大佬覺得唔合理，我地三個人一壺茶收三十蚊茶錢，人地一個人一壺茶亦祇收十蚊茶錢，我們是否有權要求要三壺茶呢？

此店看來主打是綠茶/紅茶甜品，但亦提供茶造的冷/熱麵，不過總類不多；即使是甜品，選擇亦少----每款甜品大約一百蚊一客！客人必須每人柯打最少一款食物，當然有權大家share嚟食。

一百蚊食個甜品貴唔貴？對住無敵海景喎！不過The One所有食肆都係呢個海景架啦。

姪女叫左呢款：有綠茶雪糕、綠茶啫喱、日本紅豆、小丸子

姪女替老豆叫左沙冰：嘩！好大份。綠茶、紅茶糖膠分開上，自己可以控制甜度。

我梗係揀抵食夾大件架啦(價錢一樣)----姪女有嘅嘢我都有(除了綠茶啫喱)，我多了一小件綠茶、一小件紅茶蛋糕，一粒栗子、一球鮮忌廉！

此店有大約三份一地方用作放擺設、各款茶包、蛋糕及糖果。我地都認為浪貴---租咁貴、客人等位又等咁耐，不如改設多些坐位好過啦！

此擺設得個睇字！

有點似十蚊店：擺放各式茶包

雪柜內有紅茶/綠茶蛋糕，糖果、曲奇之類可供選購：

令人奇怪的是：我們這一檯年紀最大！其他食客都是廿來卅歲---既不是求學年齡、更非強國人士！響呢啲時間來吃甜品、仲要係貴價甜品，這些是什麼人？

我地估：

一. 佢地讀完書，冇做事---可能係搵唔倒工，亦可能有工嫌辛苦唔做！以佢地嘅年紀睇嚟，佢地父母應該仲係勞動人口。咁父母辛苦搵嚟佢地自在食囉！

二. 佢地係富二代，唔駛做都大把錢駛！

三. 佢地係自僱人士，所以唔駛限時限刻上班！

答案？欠奉！

至於食物好唔好食、值唔值？見仁見智啦！不過，雖然佢好食，我同姪女講：「我唔會嚟第二次囉！人生苦短，我唔會浪費我嘅寶貴時間響度等位。」

佢嘅食物，綠茶同紅茶味都好濃！咁係正常嘅，一分錢、一分貨嗎。你響「美心」同「麵包蜜語Breadtalk」買個斑蘭蛋糕食，味道都相差好遠啦！

我地食呢三款(我地大家有share嚟食)，總結係我果款最好食！沙冰太大杯，而且太冰凍，我地食唔晒！我那款：紅茶同綠茶蛋糕都好食。