我很醜，但我很......

九月時在網誌介紹過一種經過壓縮過程的黑木耳，姪女十月經港返美國探望父母時，我送了她一小盒。

十月尾大佬與姪女回港時，大佬一見我便說：「果啲木耳好得意，睇住佢發大，好似變魔術咁，而且，發漲之後朵朵都好原整，食落又爽脆。」

反正唔知買咩嘢送俾佢做手信，結果買左兩盒(共二十小盒)俾佢帶返美國，食唔去嘅咪送俾朋友當手信囉！總好過買鎖匙扣吖。

早兩日深圳唱局，順便帶幾小盒送俾「哎呀大仔」同曲友。尋日大仔有回應---佢用嚟整「金針雲耳屈雞」，一小盒一家大小都唔夠食(我一盒要分三次)，認同好食爽口，搭我幫佢買兩大盒。

該鋪在我家附近，一進門店員便問我要唔要試吓「醜萍果」：

嘩！真係好醜呀。

如果冇得試食，我點都唔會買嚟食----係歧視你架啦！人都要以貌相、果一樣啫，你去買生果，都要揀外表靚仔嘅買啦！

試食後.....咦！又真係好有萍果味喎--------------廢話！難道萍果會有雞味咩？出奇咩：分子料理，萍果有雞味何足為奇？

萍果有萍果味、雞有雞味、魚有魚味.....聽落好似有點stupid，但係依家嚟講，一點不奇----你冇試過食雞冇雞味、食魚冇魚味咩？以前中秋節食嘅水晶梨我認為係極品，依家啲水晶梨除左仍然多汁外，真係淡而無味架！

外表唔靚仔，內涵又如何？唔見得好囉：

不過食落又真係好爽同好有萍果味！但係不算便宜，小的六蚊一個，我這個算是大的，七蚊一個！同等大小嘅富士萍果響生果檔約十五蚊四個，至於點選？自己衡量啦。

另一樣食材「角魚」，又係樣衰衰咁：(我響過去網誌亦介紹過)

今早響街市買左一斤九肚魚，其後見有一兜兜「角魚」，每兜十五蚊，於是買左兩兜加蕃茄薯仔煲湯。佢個樣係衰啲，不過啖湯好甜(我雪柜收埋有唐芹葉，等差不多煲好時，落些唐芹葉增加香味：

人同食物都一樣啫！真係唔好以貌取人。

今日係2015區議會選舉日，我投左票啦，你投左味？投票時間至今晚十時半。

都係果句啦！選區議員不同選立法會議員---前者著重地區工作，後者著重香港社會整體利益！如果區議員候選人嘅政綱淨係講政制，叫佢返屋企啦；如果佢地淨係得年青、靚仔/靚女，叫佢地去「無線」做藝員啦，反正依家做藝員唔駛演技！啱晒啲腦筍生唔埋嘅人。

我個選區有位候選人，佢自言小學去左美國、中學去左澳洲，幾年前返港，自稱對香港一無所知；好彩佢識得某某立法會議員助理，人家教識左佢好多嘢，所以佢依家立志響呢區落地生根，為呢區謀福利喎！你會唔會選佢吖？選佢不如選我啦，起馬我響呢區都住左廿年。