合和中心：唐宮一號

2004年提早退休，與政府結束賓主關係之後，曾在一「半政府」大機構工作了一年半；時間雖然短，但我地幾位不同部門嘅阿頭自此之後，每三四個月便約出來「飯聚」，講吓張家長、李家短----有咩嘢問題呢？我地又冇影響其他人！

今次約左去灣仔合和中心「唐宮一號」。市道似乎幾差，成晚加加埋埋都冇十檯人客。可能因為咁，呢排見佢響電視賣廣告。

睇吓以上嘅菜牌價錢，都唔算經濟，好彩小菜價錢尚可接受。

餐前小點：我仲以為右邊果碟係薑，原來係豆腐---甜甜地，但乾爭爭，一點也不好吃！

我地都食得好齋：

一.蝦乾肉鬆涼瓜：雖然有兩位同事表示唔太喜歡食涼瓜，但試過之後，覺得佢好食過跟住果兩種瓜菜；

二. XO醬肉鬆四季豆---太辣！雖然味道唔差。

三. 蝦乾蒸勝瓜：釀響勝瓜上面嘅肉，生粉太多---食落好「粉」！

四. 咕嚕肉：好唔咕嚕嘅咕嚕肉----汁太少！用嘅係豬扒而唔係肉排，勝在啖啖肉囉。

五. 叫埋叫埋都係家常小菜，我覺得唔係咁好，建議叫呢個「鮑汁煎金蠔」，每隻$38，幾好食！金蠔有季節性，唔係經常有得食。

六. 臘味飯(四位)：雖然我地有七個人，但每人都分倒一碗！臘味另碟上，又唔記得影相！

七. 此酒樓現凡光顧晚飯，每位送「燒乳鴿」半隻，又唔記得影相：雖然係送嘅，不過質素唔差，好juicy、亦唔咸！

八. 冰燒三層肉：一般！又唔記得影。記憶中其他食肆係用五層肉做！

九. 我地叫左三款甜品分嚟食：「椰汁桂花羔」---好味！但椰汁味較桂花味濃。「棗羔」又唔記得影，熱食，好味！「蛋白杏仁茶」---好味！

睇嚟此店甜品做得比較出色！七個人平均每位一百九十蚊。食物一般、環境唔錯、服務亦唔錯！