估佢唔倒！

上星期有舊同事結婚，一年前經已預告左，但當日我因事未能出席。當晚其中一位舊同事whatsapp我：「我同？到左，你幾點鐘到？」

我當時打左個突，因為我地呢幾個人每三個月左右會約一次飯聚。我當時身在深圳，心諗：「吓！我約左人唔記得？」

打開手機個日曆睇吓，哦！果日係同事婚宴，佢地見唔倒我覺得奇怪啫；於是咪回覆佢告知我唔會出席囉！

第二天，我的前助手又whatsapp我：「何解尋日見唔倒你？」我告知佢情形，佢約我尋晚過嚟紅磡食飯聚吓。於是咪約左響「金坊」食泰國菜囉！

響我認識嘅朋友當中，有兩位係超揀飲擇食嘅，除左我果個「哎呀大仔」，便是這位同事。

點菜時，佢問我想食咩？我答：「我同啲豬朋狗友竹戰完都係響呢度食，菜式同人都冇咩嘢變，都幾悶！反正新人事、新作風，你又咁多嘢唔食，不如你點菜啦，我好少嘢唔食嘅！」

同事：「你食唔食獅蚶？」

我：「吓！你竟然食獅蚶？」同事聽見我咁講，我相信佢會諗我唔敢食！

我：「食！我細細個去中環大箮地有得食。果陣時係一兜兜(蜆、青口、獅蚶...)賣，你揀中邊兜檔販便灼熟拎俾你食。不過，講起上嚟，都冇食幾十年咯。真係冇諗過你呢樣唔食、果樣唔食，竟然會食佢啫！」

幾十蚊一碟「白灼獅蚶」：雖然話係白灼啫，其實都好生，不過就好爽甜。

獅蚶，在泰國街頭經常吃得到，有一啖似血、入口帶腥的血水、滑溜溜口感，味道是重口味版生蠔，並非人人接受得倒。 雖然闊別咁耐，我覺得OK喎！不過，大size果種(好似貴妃蚌咁大)我就打死都唔食---細個果陣試過，食到成口血！

不過，依家食呢類食物要小心一點，唔係人人胃口可以接受，食肆衛生情況亦需考慮。我尋晚食左，今日都冇事！Touchwood(閘住)