新品種水果

自從退休後，近呢三年都少左買水果食；因為血糖偏高，而水果果糖多，所以少食，祇間中買嚟過吓口癮`。

響深圳曲社操曲，每次均有位阿叔拎啲水果嚟賣；不過，我唱曲時很少食嘢，所以佢指意我幫趁---死得！

有次響某曲社唱日局(我通常都係唱日局)，那位水果大叔拿著一袋有葉的橙交給曲社位姊姊，叫佢幫忙交給夜局的某太，聲稱佢地訂左。

他離開後，曲社姊姊同我講：「某太佢地試過這種橙，覺得好食，於是訂左。」

其後我響「明輝」操曲，東哥拿著兩個橙(正是之前講果隻)問我食唔食？我答：「唔食啦！唔駛客氣。你鄉下攞嚟架？」

東哥：「唔係！正話生水果阿叔嚟，我問佢有咩嘢好介紹，佢送左兩個俾我試。」

我：「吓！咁就要試吓啦。」東哥千叮萬囑：呢隻橙要剝皮食，唔好切開嚟食。」一試之下，果然好甜喎！深圳價：人民幣十蚊五個。(因為曲友聽見我話好食，即刻買左十蚊回港。)

上星期行過樓下間「街寶」，竟然有得賣(叫做「葉橙」)：廿蚊七個！於是買左廿蚊，真係好好食，而且依家啲橙動不動都要五蚊一個，呢種算係平價之選吖。

今早見「祥興」都有得賣，個子大一點：十二蚊3個。(「街寶」又減左價：十蚊四個)

今年留意倒有一種叫「人參果」我的水果。其實以前都有種啡黃色外皮嘅生果，亦叫做「人參果」，我覺得唔好食；今次對呢種又叫「人參果」嘅水果亦冇咩嘢寄望，所以都冇諗過買嚟試！但係早兩晚睇肥媽個「暖DD，食平啲」節目，居然放左碟「人參果」響度，「六號」仲讚話好甜喎！

新嘅呢輯食平D，舊瓶舊酒，冇咩野新意;不過總好過果輯剛播完嘅「閨蜜教煑」，都吾知如何歸類？如果話係烹飪節目，睇完都係吾識煮！話係清談節目，内容又吾係一般人有興趣嘅話题！

言歸正傳，於是我買嚟試吓：廿蚊兩斤！呢檔水果通常冇得揀，所以我同看檔位哥哥講要兩斤。哥哥當時唔得閒，佢叫我自己揀！我揀緊果緊，哥哥得閒啦，我問：「係咪稔嘅先至夠熟？我未食過架！(我咁講係：佢如果知我未食過，梗係要教我點揀啦！好食先有下次架馬)不如你幫我揀吖！」

哥哥：「你揀啡色果啲吖！不過反正你唔會一次過食晒，我幫你揀一啲生、一啲熟嘅好唔好？」我梗係答好啦！當時旁邊另一位姊姊牛咁眼望住哥哥，我諗佢一定係覺得哥哥唔應該俾我揀、更加唔應該幫我揀！

哈哈！試食之後，我認為佢係好食嘅，多水多汁，有點似食「金瓜」，不過一定要夠熟，皮有少少硬(我講係同肉嚟比較)，不過食埋問題都不大！得意在佢啲核好似奇異果咁，食得嘅。

左邊果個係熟嘅、又邊果個係未夠熟嘅：