俾「麥當勞」搵左笨

我一個星期總有一兩天幫趁「麥當勞」食早餐，不過食來食去都係果兩款：3號早晨全餐或4號熱香餅餐。

不過，唔知大家有冇留意，原來「麥當勞」唔同店嘅價錢係有差別嘅呢？我所講嘅唔係唔同區嘅差別(機場店、遊客區價錢稍貴屬正常)、而係同區唔同價錢！原本我一向用八達通結脹，冇特別留意呢樣嘢；我祇知道響十一月時，我幫趁家維邨「麥記」係$26一個早晨全餐。隔左兩日，因為食完早餐要去黃埔花園間匯豐銀行，因利成便咪去黃埔花園間「麥記」食囉！等候取食物時我才留意倒此店早晨全餐是$27.50一份。

我第一時間諗：呵！那天是十二月一號，可能是加了價！

但隔左個星期，我再去家維邨果間，仍然是$26。咁即係唔同店、唔同價錢啦！

對我來說：家維邨店、紅磡灣店、黃埔花園店，路程一樣！祇差在我食完早餐跟住會做咩嘢？無論如何，論價錢、論方便，黃埔花園果間都非我所選。

不過，2016年真係加左價，依家家維邨都要$27一個早晨全餐。

兩個餐食得多都厭啦！呢輪見「麥記」響電視賣廣告，有新嘢喎！其中一個廚師早餐，個樣都幾吸引----食完至明白以貌取人唔啱！以貌取物一樣係唔啱嘅道理。

早幾日過天后，咪去果頭間「麥記」叫呢個廚師早餐囉！

$29：一睇！吓，廿九蚊咁「多」嘢？同電視廣告相差好大啫！雖然相睇同現實一定有距離。呢份餐之所以吸引倒我係果兩片腸啫---須知道，跟一般餐果片豬柳真係食到好厭、亦嫌佢咸左啲。唉，可惜食落呢兩片薄到風吹得起嘅腸一點不好吃---又冇味、又乾、又吾熱，似係雪柜拎出黎放至室温，便切片上碟。罐頭茄汁豆我一向唔食，所以果日我係食炒蛋多士啫！

呢幾日都仲響度諗：點解咁少份量可以收得咁貴？總係覺得有啲問題！想再睇番電視廣告印證又見唔倒！

今早去家維邨間「麥記」，望吓佢張相，迷底終於解開啦：

原來我果份少左件薯餅呀！

哼哼！咁都得。