一於架空佢地啦！

嗱，又病發嘞。立法會工務小組委員會日前第六度審議高鐵一百九十六億元追加撥款申請，反對派繼續拉布，主席盧偉國無計可施，宣布剪布，點知引起反對派強烈反彈，不斷挑機，仲演變成隔空對峙，被迫兩度腰斬會議添。由於剪布失敗，政府把心一橫，喺會後宣布繞過工務小組，直接將撥款申請提交財委會審議。

唉，立法會審議工程搞到好似細路仔玩泥沙咁，又兒戲，又胡鬧，連蠱惑仔紮馬鬥兇呢招都出埋添，問你服未。即係咁，港府今次繞過工務小組，雖然有違議事程序，不過唔係完全冇道理架。正如有人話齋，工務小組深陷拉布陣而動彈不得，淨係開會處理反對派提出嘅休會動議咋，已經總共耗費四個小時，再咁落去，高鐵追加撥款想唔胎死腹中都幾難。立法會嘅職責本來係監察施政，依家變成阻撓施政，政客為咗達到政治目的，不惜攞七百萬人嘅利益做籌碼，簡直豈有此理。

其實計功夫茶話齋，好多政客淨係識做政治騷，對工務工程根本一竅不通，工務小組淪為鬥爭工具，窒礙經濟民生，何止可以繞過，直頭可以摺埋添喇。唔係咩？港府今年度向工務小組提交七十二個總值六百七十五億元項目，包括葵涌醫院重建工程、屯門醫院手術室大樓擴建計劃、青年宿舍計劃、九龍東將軍澳至藍田隧道等，但至今只處理咗五個項目，涉及款項區區五十多億，你話死唔死吖？工務小組唔係協助處理工程，而係一味阻撓工程，係咪唔要好過吖？

話時話，高鐵追加撥款寸步難行，咪就係成個立法會七國咁亂嘅縮影囉。工務小組就話可以繞過啫，但避得過初一，避唔過十五，反對派點會咁順攤畀高鐵追加撥款喺財委會過骨吖。嗱，反對派揚言反對到底，萬一工程被拖垮，變成國際笑話事小，公帑損失事大。唔怪得有人話，今日嘅立法會成個鬥獸場咁款，處處拉布，日日開火，遲早淪為壓垮香港嘅最後一根稻草。

講起真係可悲，本港經濟隱憂重重，危機四伏，議員每月逗成十萬蚊人工，理應為民排憂解難，點知偏偏添煩添亂嘅就係佢哋。冇符喇，政客有破壞、冇建設，為阻撓施政無所不用其極，最終損失嘅又係香港同市民，淨係高鐵咋，一旦停工，估計有七千名工人即時打爛飯碗吖。

高鐵直上財委會，可惜香港冇路行。寨卡病毒無疫苗可以防止，政治寨卡病毒更加冇得醫，再咁落去，香港遲早死路一條嘅咋！

-------------------------------

都係果句啦：如果唔解散垃圾會，退而求其次，咪架空佢囉----即係話津貼照出，唔駛佢做任何嘢。咁雖然駛左好多寃枉錢，但總好過原地踏步、俾佢地阻住個地球轉吖！