逢政府必反！

儘管特區政府施政有諸多不是之處，但我寫網誌均抱著對便支持、錯便反對的原則；偏偏有些別有用心之士，逢政府必反，還要利用網絡以遍概全(註)：講啲唔講啲，有心誤導其他不知內裡的人！

教育局去年底推出諮詢文件，標題為：更新中國語文教育學習領域課程
(小一至中六)各位有興趣睇全文，可登入http://goo.gl/WR4uRx

今早收到同學從whatsapp傳來，指教育局靜靜雞進行諮詢，指要小學生學簡體字！並請各界反對，令政府知難而退咁話。

我即管去望吓份諮詢文件，裡面講左好多嘢，要小學生開始學簡體字祇係其中一項；偏偏有心人樣樣唔講，淨係提呢一樣！更加冇解釋何解教育局建議學生學簡體字！開頭果段仲話：「繁體字是世界上最富美感和意義的字體，使用繁體字也是香港人引以為傲的事。香港政府要學童學習簡體字，實是以劣幣驅逐良幣。方案諮詢期到下星期一為止，保衛香港文化，請向政府反對訴求！」

請問各位同意否？

「繁體字是世界上最富美惑和意義」呢樣嘢，未知曾否經過選舉而作出的定論？

又真係有咁啱、得咁啱，早兩日與「哎呀大仔」遠足，佢又咁啱講到佢支持學生學簡體字。佢有十幾個孫讀緊小學，佢嘅意見絕對有代表性。

依家啲人真係咁鍾意繁體字咩？網絡發達，依家響電腦/手機寫字，很多時但求音同便算！

我一直以不懂簡體字為憾：因為很多內地出版的書藉非常便宜，但均以簡體字出書；我唔識簡體字，閱讀有困難，惟有棄之。但香港乃中國一個城市，繁體字據知亦祇有香港、澳門與台灣採用，相對整個中國十三幾億人口，祇是小巫見大巫！我們何解不去認識簡體字？這樣將來在社會工作(特別是與中國有來往的機構)祇會有好處。

再者，文件祇是要小學生學簡體字，我見唔倒要用簡體字取代繁體字！

至於是否靜靜雞進行諮詢？文件寫著：希望「持份者」表達意見。「持份者」我嘅理解係：教育界、學生、家長。由於我並非持份者之一，所以我並唔知道有呢份文件，咁又有何關係？「哎呀大仔」知呢件事，因為佢嘅子女同孫都係持份者，所以佢從他們口中得知。據佢講：孫兒從學校得知！身為家長嘅子女與媳婦都支持小學生學簡體字，認為將來有商機。

當年小學生要學普通話，一樣有人反對架！依家大家評評理，學普通話好、定係唔學好吖？唔喜歡學普通話果啲：一係冇語言天份(咁唔係唔想學，係學唔識啫)、一係唔想認係中國人(但係衰在佢點唔認，佢都係中國人呢)、一係俾人沒收左回鄉證(冇得返中國，學嚟都冇用)、一係冇機會去星加坡同台灣....一係冇工作，冇人請咁就....依家做售貨員都要識普通話啦！

我估反對聲音除了來自「逢中必反」、「逢政府必反」人士外，便是那些「教棍」！鬼唔知咩，要小學生學簡體字，首先身為教師嘅便先要學識簡體字，咁咪增加左佢地工作量，少左時間灌輸歪理俾學生囉！呢班嘢不學無術，最好樣樣嘢都唔變，連佢地果份人工都五十年不變！

阿仔講得啱：依家啲人反共反到上腦！

吳克儉：雖然你有百樣不是，但響呢一樣，我係支持嘅！

註：

以偏概全：意思就是俗語所說的,一竿子打翻一船人,也與『斷章取義』有異曲同工之處

解釋: 以少數的例證或特殊的情形，強行概括整體。

如：調查取樣務必審慎，避免以偏概全，造成誤導。