花膠雪耳木瓜湯湯

往年過年，我通常唔會買定餸；因為瑛師伯逢初一、十五食齋，所以每年年初一佢都訂定一圍齋，招呼師公一家同我食。

年初二，街市檔口大部份已開業。今年不知何故大部份攤檔都貼上「初八啟市」的紅紙。物以罕為貴，嘩！上個星期啲菜價真係好貴：三十幾蚊一斤普通菜！最抵食都係椰菜：幾蚊一斤，我可以食兩餐。

好彩！我平時都買埋好多急凍食物，總算唔駛焗住買貴餸。尋日忍唔住，要煲番個老火湯飲啦。嘩！買舊豬展都成五十幾蚊！

材料：

木瓜一個去皮切件

豬展一件切件飛水

花生半碗略浸

已浸發雪耳

已發花膠

南北杏

蜜棗四粒

果皮

煲滾適量水，放入所有材料煲滾。滾約十分鐘轉細火煲兩小時。