真的與管治無關？

事不關己講唔通

搖旗作亂嘆詞窮

昨是前因今是果

猴年正是褲穿窿

在幾日前聞得上議院代表光翟棠話、初一暴亂與講府管治無關、只係一小撮講獨分子搏出位而矣！冇錯、真正嘅揸旗者只有幾十人、但應互聯網呼籲走上街頭參加行動者卻有六七百之眾。這說明了社會上確實有一群人、由其是年輕人、對講府有所不滿。在下一直都認為、作為管治一個總體嘅政府若是偏聽、偏視兼唔信邪嘅話、社會勢必失去平衡、而矛盾就有增冇減。由戰中、鳩烏、驅蝗、反水客、至到今次嘅所謂保衛小販夜市嘅暴亂、正好顯示出暴力事件已經續步升級。試問又豈能自圓其說、話與講府管治無關？

在前殖民管治朝末期、本地工業已經開始北移、在大歸後歷屆講督更加不遺餘力的鼓厲本地商界北上發展。雖然朝廷回敬給本地旅遊業發展、並帶旺了酒店、餐飲、百貨、零售等服務行業。但對於基層打工仔來講、職場由多元化趨向單一化。年輕人面對着學歷高工資低嘅情況、並唔係佢哋唔想搏、而係冇機會去搏。在褓呔任職講督七年半期間、首先是託辭挽救地產市場、按緩公屋供應和煞停居屋興建、置基層鬧屋荒而不顧。其次就以發展醫療服務為名、大開中門讓中土孕婦入城分娩、好讓私立醫院大發接生財為實、結果引爆中土與紫荊城兩地人民嘅矛盾、並且留下後患無窮嘅雙非問題畀紫荊人嘆。最後就係以振興旅遊業為藉口、大虐放縱水客到處與基層市民爭購奶粉和日常必須品、結果在基層民生方面造成猛烈衝擊、並將“中紫”兩地人民嘅矛盾推至沸點。雖然以上種種皆是劫貧濟富之舉、亦係政策上嘅失誤、但偏偏有些權貴總是不以為然、以令到社會上仇商、仇富、仇政府嘅情緒日漸高漲、亦為激進政治組織創造了生存空間。所謂冰封三尺非一日之寒、何況仲係民生無小事？

坦白講、如果管治真係冇問題嘅話、坊間何來那麼多怨氣？莫講話搞事者在互聯網上吹雞、即使在馬路中間豎起支旗都冇人會望一眼。試問又點會有大批市民在大年初一跑上街頭參加暴亂？所謂知恥近乎勇吖嘛！如果管治當局連自我查找不足嘅勇氣都欠奉嘅話、又憑啥去化解社會上嘅矛盾？再係咁搞落去、就真係會變成官逼民玩架喇！