五種祛濕食材
2016/02/27 06:52:56 網誌分類: 健康
過完年唔使幾耐又到「霉霉噏噏」嘅梅雨天喇！喺中醫角度，天氣潮濕會造成脾胃濕困，令人覺得全身無力、又攰又想瞓，抵抗力亦都會下降，容易作病！想祛濕不妨試下以下5種食材！
1. 薏米
利水祛濕、健脾清熱，仲可以美白同滋潤肌膚！唔怪得天氣一潮濕，好多人都會煲薏米水嚟飲啦！
2. 蓮蓬
唔講都唔知，原來蓮蓬上上下下都咁有用！除咗蓮蓬之外，蓮子同蓮葉都一樣有祛濕功效！
3. 白蘿蔔
有清熱氣、去水、解毒嘅功效！不過白蘿蔔性質偏涼，寒底人士記得唔好食太多！
4. 粟米鬚
沖水焗嚟飲可以去除體內濕氣，仲可以改善腎功能、有祛濕同去水腫功效，水腫人士不妨一試！
5. 土茯苓
土茯苓係祛濕湯水常見嘅藥材之一，因為土茯苓有清熱解毒、除濕嘅功效！
不過就算天氣潮濕，祛濕湯水間中飲下就夠，過量飲用會令身體排水過多，引起其他問題！
試下紅豆薏米水啦。