回到英政府管治年代

新界東垃圾會補選結果，令人心情沉重----今後垃圾會真係名副其實的垃圾會：因為又多左件垃圾！

呢幾日與不同朋友傾計，似乎大家都有一個共識：就係希望香港能夠回到過去----最好係廉署成立之後、彭定康到任之前嘅一段時間。

何解？彭定康係香港嘅歷史罪人，係佢到任之後攪左個「代議政制」，放低左個計時炸彈，等回歸後響香港引爆！

響廉署成立之前，香港各行各業，貪污成風！想當年，辦事真係無財不行，所以電影橋段才會有「有水有水、冇水冇水、要水過水、有水放水」呢句諷刺之語；果個年代，如果冇錢，真係燒晒間屋消防員都唔會幫你救火架！

不過，廉署成立三十幾年，依家積弱啦！有老虎唔打、淨係打蒼蠅，做事船頭驚鬼船尾驚賊，不復當年勇！

英政府管治好咩？好過依家囉！

想當年：

一. 港督係英政府派嚟嘅，有冇人夠膽講：我唔願意吖？

二. 所有行政/立法議員均由政府委任，有冇人夠膽講：我唔同意吖？

三. 無論任何會議都係進行得有條有理嘅，何來會有啲「垃圾」響度

     倒亂議會秩序呢？

四. 想當年，香港人生活雖然較現在清苦，但那個年代，祇要你肯做、肯捱，總不會餓死你！

五. 想當年，我都要四十歲才「上車」，不過，我好珍惜我現在擁有的一切；我當年也不會怨天尤人，怨政府冇幫我「上車」；

六. 想當年，我地呢一代，小小年紀，放學後便要幫手打理家務、甚至做點手作幫補家計。但那些年，沒有人會怨政府、怨辛苦，何解依家啲人事無大小都要鬧政府，難道佢地自己真係冇責任咩？

七.想當年，入讀大學遥不可及，但那時中學生學術水評較現今大學生高;而且學生更尊師重道。

講來講去，咪因為依家太民主囉！民主到警察封左山路都有人破口大罵，認為條命係佢嘅，佢鍾意點都得！不過，如果佢真係有危險，你唔救佢又唔得；民主到學校請邉個,炒邉個都要學生同意;民主到暴徒用磚頭掟向警員就係造反有理，警察向天鳴鎗警告就冇理，嚇親佢地喎！呢個係咩嘢世界嚟架？

依家攪到我都寧願做殖民狗添！