百物騰貴,香港生活難!

2016/03/11 10:46:07 網誌分類: 生活
11 Mar

剛過完年,忽然間覺得食咩嘢都貴左!

3月1日過灣仔與曲友開局兼開年。那天我們約左傍晚六點見,我四時多便去到灣仔,目的是去克街果間「靠得住」食粥。

食粥?有冇攪錯?識我嘅人都知我最討厭食粥;冇錯,除左呢間。

「靠得住」之前是灣仔利東街一間小店。我2004年提早提休又重出江湖,便在灣仔胡忠大廈返工。我通常一個人食午飯,偶然發覺呢間鋪寫著泥鯭粥廿蚊一碗(2005年)。我細細個便喜歡食泥鯭,於是入內一試,便一試鍾情。

期後,利東街收街,此店便遷往現址,價錢亦自然不同;不過,與今時今日相比,又真係....

新鋪我亦有間中幫趁,但係離我寫字樓遠左,真係I walk a mile for a Camel架!我試過食魚咀粥、豬肝粥...都不會失望。再轉工後,雖然仍在灣仔工作,但距離更遠,有六年多冇幫趁啦!

間中行新市鎮,發覺此店在各區都開了分店。於是好奇想睇吓食物質素有冇改變,因此專登在非繁忙時間光顧----繁忙時間,真係企都冇得你企----我講以前啫!依家唔知。

那日,全店得我一位顧客,所以幾位打扮得像經理的男女輪住招呼我,咁先可以收埋加一服務費吖馬----粥麵店都要收加一!

一碗咁細碗嘅粥加碟油菜,計埋加一:

真係食裝修囉!至於食物(冇左最吸引我嘅泥鯭粥),唔可以話唔好食,但係相比以前,真係....冇下次!

百物騰貴,難道捱腐乳咩!好在我食得唔多,熟悉我嘅人都知我一日淨係食早餐同晚餐嘅啫!而且我晚餐食得早,如果出街食,一般食個下午茶當晚餐架啦!真正晚餐份量我食唔晒。

但係,你估早餐唔貴咩?我食開果間茶餐廳,同一份早餐新年前是廿八蚊、新年後已加到三十蚊!而且個果杯奶茶杯明顯矮左一載。

早幾日去將軍澳行山,書友仔帶我去附近商場間「一粥麵」食早餐。

我問:「一粥麵」食咩嘢早餐?」我驚要食粥。

書友仔:「佢有麵、有多士、有奶茶...又較「翠華」便宜。」

我:「我果區都有「一粥麵」,祇不過我唔諗起佢有早餐食。再者,佢響我去街市嘅相反方向,所以我冇去過。」

今早我去紅磡果間店食早餐(今日唔駛買餸):$22炒麵加奶茶,抵食!而且,不知何故,依家好多茶餐廳嘅所用嘅午餐肉不單唔好食,直情係難食!相比之下,呢間算好食---雖然我好少食午餐肉!

尋晚響MX食晚餐(其實係下午茶),$36 --有迷你叉燒飯、碗仔翅同柚子蜜,抵食!份量亦啱我。

成日出街食?唉,有時間嘅,我都寧願「自煮」,不過自煮也不便宜,你估買餸便宜呀?不過,自煮無論如何都健康一點。

回應 (0)
我要發表
user

最新回應

立 冬
立 冬 2018/06/13

新版都有好處的, 至少用手機來睇會較以前方便.  你休息夠了再回來啦!   {#iconb_21}

VanYYY
VanYYY 2018/05/24
@域 流亦詩...

雖然我封舉,有空仍會拜讀你的大作!

KING.
KING. 2018/05/19

都要改啦, 以前頭條blog都唔係mobile reponsive web. 而家改左,你有冇發覺冇以前咁棘.

域 流亦詩
域 流亦詩 2018/05/18

祝你身體健康、愉快。它朝有機會再在博海相見!