釘公滾蕃茄湯

前日朝早拜山，回家時已接近正午十二時，趁街市未收檔，拿拿林走入去買餸。

前日天氣潮濕，響山頭經已覺得好唔舒服，所以諗住煲去濕湯飲；但行入街市，見倒有一兜兜嘅「釘公」賣，因為唔係常有，所以買左兩兜煲湯，寧願去涼茶鋪買樽五花茶飲。

我對「釘公」有情意結。十幾歲果陣，我每星期都去大潭灣扒艇釣魚；那時釣得最多的是釘公、鱲魚、哨牙妹(假青衣).....好奇怪！我朋友經常釣倒雞泡魚，但係我從未試過！

材料：

釘公兩兜洗淨抹乾下鹽及胡椒粉略醃

蕃茄三個

薑一舊

茨實一碗略浸

將魚略煎，倒入適量滾水待大滾一會，下其他材料煲兩小時，隔渣飲湯。

好甜呀！