醉豬手、醉雞翼

上星期響上海南貨店買「糟滷」，預備整「醉豬手」。

醉豬手最簡單(梗係簡單啦，複雜果啲都懶整)係買急凍豬手粒(百記有得賣，一包約兩磅，廿多圓)；我響「街寶」買，十蚊一磅，貪佢有得揀：我祇揀中間果一截！所以久不久要去巡吓，因為好多時俾人揀剩啲腳趾。

雖然話簡單，不過都幾多工序，整「醉雞翼」就真係簡單啦！可能因為咁，所以外面上海鋪唔係間間有得食；始創中心間「上上」有得食，亦整得唔錯！

材料：

急凍豬手兩磅(溶雪後先飛水五分鐘，徹底洗淨)

薑8片

花椒半湯匙

糟滷料：

糟滷一杯

紹酒1/2杯

凍開水一杯

糖1茶匙

鹽1/2茶匙

一. 先預備一大碗冰水。

二. 將已飛水的豬手放煲中，加入薑片、花椒及過面水煲滾，收細火煲兩小時。

三. 撈起豬手放入冰水中至涼。為了方便食用，我將其中一條大骨除去。

四. 糟滷料拌勻至糖鹽溶化。將已浸凍的豬手隔水放入糟滷料內先浸12小時，才放入雪柜。

五. 食時隔去酒滷。

第一次整，我覺得好成功架！書友仔話下次聚會整俾佢地食喎，我梗係冇問題啦，今朝仲拿拿林買定啲豬手(前面都講左，好多時揀剩啲腳趾架！所以見倒有就要買定)；到時集思廣益，睇吓大家意見需唔需要調較吓啲味道------呢啲咪叫做民主囉，唔係我話好食就係好食架！

註：

一. 剛浸入糟滷料的豬手頭12小時不宜立刻放入雪柜，較難入味。

二. 不同牌子的「糟滷」咸味不同，要自己先試吓。

三. 醉豬手主要食筋同皮(即骨膠原)，所以不宜用成隻連肉的豬手：豬肉煲兩小時會「鞋」。

四. 浸冰水可令豬手較爽脆。

五. 視個人喜愛口感，可將豬手煲多15分鐘。

醉雞翼

用完嘅酒滷，其實可以留番下次用(當然唔好放太久啦！唔壞都阻左個雪柜啲空間啦)。我見冰格內有幾隻雞翼，所以隔左兩日用剩餘嘅酒滷整「醉雞翼」：

急凍雞凍中翼九隻(我買呢隻特別大隻)，所以洗淨蒸左十二分鐘，熄火再焗兩分鐘

酒滷

冰開水

雞翼蒸熟隔水，放入冰水內浸涼再隔清水，放酒滷內兩小時，再放雪柜兩小時。雞翼質地與豬手不同，不宜浸得太耐(越耐啲肉越實架)。

註：用新鮮雞整梗係好食啲啦！