最忌係內亂

政情：民記內訌 搵外人出戰

立法會區議會（第一）功能界別議席（區一）過去一直都是由佔十八區區議會四分一議席的民建聯（民記）壟斷，最近民記內部遴選選出由黨內北區區議員劉國勳代表出征。不過，劉國勳能否順利保住議席仍是未知之數，皆因該黨內部對劉國勳出選意見紛紜，有人更反建議由「街外人」九龍東立法會議員謝偉俊轉戰區一，Paul亦承認確有此事，今次民記真係「籠裏雞作反」、「手指拗出唔拗入」！

黃國健或漁人得利

近日政圈流傳有民記黨員不滿劉國勳出選區一，更有分析指工聯會（工記）九龍東立法會議員黃國健選情勢危，如身兼灣仔區議員的謝偉俊由九龍東轉戰區一，黃國健就可以抹一額汗，所以工記區議員為保「黃」而過票給謝偉俊不無誘因。謝偉俊本身亦是元朗十八鄉瓦窰頭村原居民，形象又較為專業及偏向行中間路線，如果獲泛民主派、鄉事派、工記及不滿劉國勳的民記中人過票支持，相信有一定贏面。

謝偉俊尋日承認，最近確有口痕友向他提出過轉戰區一的建議，當中甚至有民記中人，還稱自己到現在才知道民記並非「鐵板一塊」，該黨內部對劉國勳出選都有爭議。不過，對於轉戰區一，他坦言「唔係好大可能發生」，因為他一直行緊爭取多些選民支持的方向，所以如果出面並非風大雨大，無他的容身之所，他都會盡量留在九龍東選區。他還稱，出戰地方選區是一個「偷懶概念」，因為易過以前循旅遊界功能界別出選喎。

劉見有暗湧即搏盡

雖然謝偉俊暫時似乎對出戰區一意欲不大，但民記「籠裏雞作反」已為該黨響起警號，即使劉國勳經黨內百多名區議員一人一票遴選產生，但相信黨高層都要安撫部分黨員不滿情緒，否則隨時爆退黨潮。據聞劉國勳亦不敢怠慢，不但陸續拜會建制派區議員，更自爆是半個元朗原居民，指其母親是元朗十八鄉英龍圍原居民，疑似向原居民拉票。未知他是否察覺到選情有暗湧，所以要搏到盡呢？

----------------------------------------------------------------------

現今的香港，容不下中間派(祇能有忠奸派)，所以普羅大眾，祇能夠選擇親建派定係親非建派。

唔駛講，我係親建派，但絕不是親「梁」派！我支持國家、支持香港政府，祇要佢地做對事便可；無論如何，我唔會支持人收外國錢，幫外人打香港人、中國人-----這是我身為中國香港人的底線！

「犯民」為左個人利益，為左爭取繼續連任，可以唔駛做正經事，便可長嘆多四年，派與派之間經已四分五裂；我真係唔希望建制派出現同樣局面。

大家可唔可以用香港前途作為大前提，在考慮支持某候選人之時，先放低門戶之見(當然那人必須愛國愛港)，祇考慮對方在某選區的勝算呢？

即使是現任議員，是否即使冇勝算，仍要勉強留任而繼續參選呢？

一直以來，鄉議局在每次垃圾會選舉，都似乎未盡全力(唔好聽啲講句，有幾多原居民聽鄉議局支笛都成問題)；如果同是建制派都未能團結，如何對外？

睇吓幾個月後嘅選舉：

「犯民」現有議員，大部份踏入暮年，佢地黨內都不少聲音希望佢地落台，讓位給年青一輩！當然，講係咁講啫，十幾萬銀一個月，有權有勢，我都唔捨得啦！

      有些人與事令人難以割捨
      該放下的還是得放下！
      曾經擁有的 ...
      不代表永遠屬於我
      天空裏的雲彩此刻飄映絢爛...
      卻只是我人生裡的過客 ...

年青一輩所謂「傘兵」、「中箭」，有幾多日人(有啲書都未讀完)、有咩嘢社會經驗(連開個銀行戶口都未識)？淨係心口得個勇字，經得起風浪咩？當然，社會有部份人士求變：因為梁政府做得唔好，但唔可以因為咁而否認自己係中國人，更唔應該因為咁而幫走狗辦事，人應該有自己底線。

新界東補選結果，其實好多人一早估中！因為新東是新市鎮，選民多是年輕人，佢地很多未捱過咸苦，祇知認同朋輩！想深一層，是他/她們家長同近呢廿年教育問題。他/她們大部份是受保護的一群，祇知不平則鳴，卻未識如何解決問題----「佔？」、燒垃圾桶、衝擊.....可以解決問題咩？

做人唔可以淨係識得批評，要識得解決問題；否則變成淨係識得破壞、唔識得建設！

我唔係唔贊成俾機會年輕人，但係垃圾會呢個有權立法嘅機關，一定要揀一啲有社會經驗嘅人，唔可以為俾機會年輕人而揀佢地，一些連「蚊」型活動都攪唔掂嘅人，可以做出咩嘢？

我祇希望建制派能夠撇開成見，和衷共濟，以候選人的勝算為大前提，為香港福祉作出正確選擇！

因為「犯民」令我地冇左選特首權利；身為選民，我地更加要為「垃圾會」選舉把好關，否則唔好講「十年」，香港五年都捱唔過！